Rýslan Izımov: Tsındao sammıti ShYU tarıhynyń jańa paraǵyn ashty

ASTANA. QazAqparat - Shanhaı yntymaqtastyǵy uıymynyń Tsındao sammıti kútilgendeı, atalmysh uıym tarıhynyń jańa betterin ashty. Mundaı pikirdi QR Tuńǵysh Prezıdenti-Elbasy qory janyndaǵy Álemdik ekonomıka jáne saıasat ınstıtýtynyń Eýrazııalyq zertteýler baǵdarlamasynyń jetekshisi, sarapshy, qytaıtanýshy Rýslan Izımov bildirdi, dep habarlaıdy QazAqparat tilshisi.

"Sammıttiń aldyn ala qorytyndylary kórsetip otyrǵandaı, jańa «eýrazııalyq segizdik» bútin Eýrazııa qurlyǵy úshin jeke kún tártibin qalyptastyra alady.

ShYU-ǵa múshe memleketter basshylary óz sózderinde atap ótkendeı, uıym 2025 jylǵa deıingi Damý strategııasynda belgilengen bazalyq mindetterge basymdyq berýdi jalǵastyra beredi.  Olar - saýda-ekonomıkalyq yntymaqtastyq, ShYU keńistiginde qaýipsizdikti qamtamasyz etý, kólik-logıstıka salasynda ózara árekettestikti keńeıtý, mádenı-gýmanıtarlyq baılanysty nyǵaıtý", - dedi sarapshy.

Ásirese, Elbasy Nursultan Nazarbaev ShYU-ǵa qatysýshylardyń nazaryn kópjaqty saýda-ekonomıkalyq baılanystardy nyǵaıtý qajettigine aýdardy. Bul rette Memleket basshysy uıym aıasynda jobalardy qarjylandyrýdyń birlesken mehanızmderin qurýdyń erekshe mańyzdylyǵyn taǵy bir márte atap ótti.

Sonymen qatar Nursultan Nazarbaev álemdegi valıýtalyq táýeldilik qaýpin tómendetý maqsatynda ShYU-ǵa múshe barlyq elderdiń ulttyq valıýtalarynda ózara esep aıyrysý qajettigin aıtty.