Rýslan Dálenov vıtse-mınıstrdi jazalaý jóninde pikir bildirdi
Parlament Májilisinde tilshiler mınıstrden áleýmettik mańyzy bar taýarlar baǵasynyń ósimine baılanysty Ulttyq ekonomıka vıtse-mınıstrin qandaı jaza kútip turǵanyn surady.
Óz kezeginde Rýslan Dálenov atalǵan máselege baılanysty vedomstvo ókili tıisti jaýapkershilikke tartylatynyn aıtty.
«Monopolııaǵa qarsy organ bul baǵytta jumys istep jatyr. Osy oraıda, ótken aıdan bastap baǵanyń negizdiligine baılanysty túrli bıznes qurylymdar eskertpeler aldy. Qazirgi kezde monopolııaǵa qarsy organdar osy málimetterdi qarastyrýda, osydan keıin tıisti sharalardy qabyldaıtyn bolady. Bizdiń maqsatymyz – baǵanyń negizsiz ósýine jáne naryqta ónim qunyna qatysty aldyn ala zańsyz kelisimge jol bermeý», - dedi R. Dálenov.
Osy oraıda ol Saýda jáne ıntegratsııa mınıstrligi áleýmettik mańyzdy taýarlar boıynsha tıisti sharalardy atqaryp jatqanyn atap ótti. Bul turǵyda ónimniń shekti baǵasyn aıqyndaýdyń tetigi engizildi.
Aıta keteıik, búgin Úkimet basshysy Asqar Mamın Premer-Mınıstrdiń Keńsesine 3 kúnniń ishinde azyq-túlik taýarlaryna baǵa ósiminiń aldyn alýǵa jaýap beretin Aýyl sharýashylyǵy, Ulttyq ekonomıka, Saýda jáne ıntegratsııa vıtse-mınıstrlerin tártiptik jaýapkershilikke tartý týraly usynys engizýdi tapsyrdy.
«Múddeli memlekettik organdar qatarynan jumys tobyn quryp, bir apta ishinde áleýmettik mańyzy bar taýarlardyń baǵasyn turaqtandyrý boıynsha qysqa jáne orta merzimge arnalǵan naqty sharalar ázirlensin. Roman Sklıar jumys tobyn basqarýdy sizge tapsyramyn», - dedi Asqar Mamın orynbasaryna qarata.
Budan buryn habarlanǵandaı, Prezıdent Qasym-Jomart Toqaev áleýmettik mańyzdy ónimder baǵasynyń ósimine qatysty vedomstvolardy synǵa aldy.
«Ulttyq ekonomıka mınıstrligi, Aýyl sharýashylyǵy mınıstrligi jáne Saýda jáne ıntegratsııa mınıstrligi arasynda úılestirý sharalary tıisti deńgeıde emes», - dedi Memleket basshysy.