Rýslan Dálenov ónerkásip salalary óte baıaý óńirler týraly aıtty
«Ónerkásip boıynsha Qyzylorda, Batys Qazaqstan, Qaraǵandy jáne Mańǵystaý oblystary tómen nátıje kórsetti. Bul rette Qyzylorda men Batys Qazaqstan oblystarynda osy jylǵy 1 toqsanmen salystyrǵanda quldyraý artty. Aýyl sharýashylyǵy boıynsha Manǵystaý oblysynan basqa barlyq óńirlerde oń úrdis saqtalýda», - dedi mınıstr.
Onyń sózine qaraǵanda, qurylys boıynsha Nur-Sultan qalasy, Aqmola jáne Mańǵystaý oblystary, sondaı-aq Shymkent qalasy artta qalǵan óńirlerdiń qatarynda tur. Aqmola oblysynan basqa, atalǵan óńirlerde óndiristik tómen nátıje qysqaryp keledi. Al negizgi kapıtalǵa salynǵan ınvestıtsııalar boıynsha artta qalǵan óńirlerdiń tizimin Mańǵystaý oblysy tolyqtyrdy. Qysqarý qarqyndary Shymkent jáne Nur-Sultan qalalarynda, sondaı-aq Aqmola oblysynda saqtalyp otyr.
«Óńirlik bóliniste tómen kórsetkishterdiń eń kóp sany bar óńirler anyqtaldy. Olar Manǵystaý oblysy - ınvestıtsııalar, qurylys, ónerkásip jáne aýyl sharýashylyǵy salalary; Nur-Sultan qalasy - ınvestıtsııalar, qurylys jáne turǵyn úılerdi paıdalanýǵa berý salalary; Shymkent qalasy - ınvestıtsııalar, turǵyn úılerdi paıdalanýǵa berý jáne qurylys salalary boıynsha. Budan basqa, atalǵan óńirlerde ınflıatsııa deńgeıi, onyń ishinde azyq-túlik taýarlaryna ortasha respýblıkalyq mánnen joǵary tirkeldi», - dedi R.Delenov.
Sonymen qatar, mınıstr birqatar óńir, atap aıtqanda Qostanaı, Atyraý, Pavlodar, Túrkistan jáne Shyǵys Qazaqstan oblystary birden birneshe kórsetkish boıynsha jaqsy serpindi kórsetip otyrǵanyn jetkizdi.
«Máselen, Qostanaı oblysynda ınvestıtsııalar, qurylys, turǵyn úılerdi paıdalanýǵa berý, ónerkásip, onyń ishinde óńdeý ónerkásibi, aýyl sharýashylyǵy salalary boıynsha aıtarlyqtaı ósý baıqalady. Atyraý oblysynan basqa qalǵan óńirlerde ınflıatsııa ortasha respýblıkalyq mánnen tómen bolyp tirkeldi»,- dedi ol.