Rýslan Dálenov óńdeý ónerkásibi ósim kórsetken óńirlerdi atady

NUR-SULTAN. QazAqparat - 2020 jyldyń 9 aıynda óńdeý ónerkásibi 3,3 paıyzǵa ósti. Bul týraly Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Ónerkásip boıynsha jalpy alǵanda óndiris kólemderi saqtaldy. Bul rette ken óndirý ónerkásibi 2,2 paıyzǵa tómendedi, al óńdeý ónerkásibi 3,3 paıyzǵa ósti.

Óńirlerdiń kóbinde ónerkásiptiń óskeni baıqalady. Eń joǵary ósimdi Qostanaı, Aqmola, Soltústik Qazaqstan oblystary kórsetti. 5 óńirde tómendeý tirkeldi. Olar: Qyzylorda, Mańǵystaý, Atyraý, Shyǵys Qazaqstan oblystary, sondaı-aq Shymkent qalasy», - dedi Rýslan Dálenov.

Onyń atap ótýinshe, óńdeý ónerkásibinde shyǵarylym 3,3 paıyzǵa ósti.

«Ósýdiń joǵary qarqynyn farmatsevtıka, daıyn metall buıymdary, mashına jasaý, onyń ishinde avtomobılder jáne jeńil ónerkásip kórsetip otyr. Óńirler boıynsha joǵary ósý Qostanaı, Túrkistan, Aqmola oblystarynda baıqalady. 4 óńirde tómendeý tirkeldi. Olar: Aqtóbe, Batys Qazaqstan, Shyǵys Qazaqstan oblystary jáne Shymkent qalasy», - dedi mınıstr.