Rýslan Dálenov: Monoqalalar men aýyldardy damytýdy jalǵastyramyz
«Eldiń óńirlik saıasaty óńirlerdiń básekege qabilettiligin arttyrýǵa jáne turǵylyqty jerine qaramastan halyqtyń ómir súrý sapasyn arttyrýǵa baǵyttalǵan. 2020 jylǵa deıin óńirlerdi damytý memlekettik baǵdarlamasy, «Dıplommen aýylǵa» jobasy júzege asyrylyp, «Aýyl - el besigi» baǵdarlamasy ázirlenip jatyr. 2018 jyldan jergilikti ózin ózi basqarýdyń derbes bıýdjeti 1 062 aýdandyq mańyzy bar qala men halqy 2 myńnan asatyn aýyldyq okrýgte engizildi. 2020 jyldyń 1 qańtarynan qalǵan 1 334 aýyldyq okrýgte 4 deńgeıli bıýdjet engizý josparlanyp otyr», - dedi Rýslan Dálenov.
Onyń aıtýynsha, jergilikti ózin ózi basqarýdyń derbes bıýdjetiniń basty ereksheligi jergilikti máselelerdi sheshýge 7,6 mln azamat tikeleı qatysa alady.
«Aǵymdaǵy jyly mınıstrlik óńirlik damý boıynsha birqatar strategııalyq jáne baǵdarlamalyq qujat ázirledi. Elimizdi aýmaqtyq-keńistiktik damytýdyń 2030 jylǵa deıingi jańa boljamdyq shemasy jasalady. Boljamdyq shema óńirlerdi damytý strategııasyn aıqyndaıdy. Onyń aıasynda óńirlerdi damytýdyń 2030 jylǵa deıingi demografııalyq boljamy ázirlenedi», - dedi vedomstvo basshysy.
Sonymen qatar, mınıstr óńirlerdegi ómir súrý sapasyn qamtamasyz etýdiń óńirlik standarttary engiziletindigin atap ótti.
«Óńirlerdi damytýdyń 2025 jylǵa deıinngi jańa memlekettik baǵdarlamasy ázirlenetin bolady. Ol qalalyq aýdandarda, mono jáne shaǵyn qalalardy, tirek aýyldarda ınfraqurylymdardy damytý arqyly halyqtyń ómir súrý sapasyn jaqsartýǵa baǵyttalady. Buǵan qatar keleshegi bar mono jáne shaǵyn qalalardy, aýyldardy, ásirese tirek aýyldar men shekara mańyndaǵy eldi mekenderdi damytý boıynsha sharalar jalǵasyn tabady», - dedi ol.
Mınıstr óńirlerdi abattandyrý, halyqty aýyz sýmen jáne sý tartý qyzmetimen tıimdi jáne únemdi qamtamasyz etý mindeti sheshilip, jalpy turǵyn úı-kommýnaldyq sharýashylyq ahýaly jaqsartylatyndyǵyn basa aıtty.
«Óńirlerdi 2025 jylǵa deıingi damytýdyń memlekettik baǵdarlamasynyń qortyndysynda ortalyqtandyrylǵan sýmen jabdyqtaý júıesine qol jetkizý artady. 4385 shaqyrym sýmen jabdyqtaý jáne 616 shaqyrym sý tartý jelisin salk josparlanǵan. Aǵymdaǵy jyly aýmaqtardy damytý baǵdarlamasynyń formaty ózgertilip, jeńildetiledi. Іri qalalardy damytýdyń 2050 jylǵa deıingi uzaqmerzimdik strategııasy men Shymkent jáne Semeı qalalaryn áleýmettik-ekonomıkalyq damytýdyń keshendi jospary ázirlenedi», - dedi Rýslan Dálenov.
Sonymen qatar, ol «Aýyl - El besigi» jobasy boıynsha keleshegi zor aýyldarda áleýmettik, ınjenerlik ınfraqurylym nysandaryn jóndeý, salý jáne qaıta qurý maqsatty túrde oryndalatyndyǵyn atap ótti.
Eske sala keteıik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jarııalaǵan bolatyn.