Rýslan Dálenov qos qoly joq kásipkerge medal tapsyrdy

NUR-SULTAN. QazAqparat - Elimizdiń Táýelsizdik kúni qarsańynda Ulttyq ekonomıka mınıstrliginde Prezıdent Jarlyǵymen berilgen memlekettik nagradalardy saltanatty tabystaý rásimi ótkizildi. Memlekettik nagradalardy Prezıdent atynan QR Ulttyq ekonomıka mınıstri Rýslan Dálenov tapsyrdy, dep habarlaıdy QazAqparat atalǵan vedomstvonyń baspasóz qyzmetine silteme jasap.

Elimizdiń áleýmettik-ekonomıkalyq jáne mádenı damýyna sińirgen eńbegi, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin tarazdyq kásipker Anara Beksultanova «Shapaǵat» medaline ıe boldy.

«Meniń týǵannan beri eki qolym joq. Men barlyǵyn aıaǵymmen istep úırendim. Tigindi de aıaqpen tigip úırendim. Joǵary oqý ornyn bitirip, ólketaný mýzeıinde jumys isteýime, kásipkerlikpen aınalysýyma, qyz balalardy ósirip, tárbıeleýime eshteńe kedergi keltire alǵan joq. Bastysy, qıynshylyqty jeńe bilý qajet. Buǵan kózim ábden jetken. Eger nıet bolsa, jumys ta tabylady», - deıdi tarazdyq kásipker.

Anar Beksultanovanyń aınalysyp otyrǵan bıznesi – kópshilikke úlgi. Ol – kásipker, qolóner sheberi, tiginshi jáne bıznesti damytýǵa arnalǵan memlekettik grant ıesi. Ony óńir halqy jaqsy biledi, batyl, tabandy, isker bıznes ókili dep tanıdy.

Bıyl jazda Jambyl oblysynyń kásipkeri Anar Beksultanova shaǵyn kásipkerlikti damytýǵa jáne jumys ornyn qurýǵa qosqan úlesi úshin Ulttyq ekonomıka mınıstriniń Qurmet gramotasyna ıe bolǵan edi.

Rýslan Dálenov atap kórsetkendeı, qaısar, batyl, isker Anardyń ómir joly men tabandylyǵy tánti etedi.

Sonymen birge, saltanatty jıyn kezinde «Qurmet» ordeni, «Eren eńbegi úshin», «Eńbek ardageri» medali, Qazaqstan Respýblıkasynyń Qurmet gramotalary, sondaı-aq, ekonomıkany damytýǵa qosqan eleýli úlesi, adal jáne minsiz memlekettik qyzmeti úshin vedomstvolyq marapattar berildi.

Eske salsaq, jambyldyq Anar Beksultanova qos qoly joq bolsa da, eki aıaǵymen is tigip, óziniń jeke kásibin júrgizip otyrǵany týraly jazǵan bolatynbyz.