Rýslan Dálenov Katar ınvestorlaryn Qazaqstanǵa shaqyrdy

NUR-SULTAN. QazAqparat – «Astana» halyqaralyq qarjy ortalyǵy ınvestorǵa qajet bolatyn barlyq quraldardy usynady. Bul týraly búgin Qazaqstan-Katar joǵary deńgeıdegi birlesken komıssııasynyń 5-otyrysynda elimizdiń Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Qarjylyq qyzmetter naryǵyn jandandyrý úshin katarlyq áriptesterime «Astana» halyqaralyq qarjy ortalyǵynyń múmkinshilikterin paıdalanýǵa keńes beremin. AHQO ınvestorǵa qajet bolatyn barlyq quraldardy usynady. AHQO zańnamasy aǵylshyn quqyǵyna negizdelgen jáne bizdiń elimizge óte qaýipsiz ınvestıtsııa salý úshin barlyq jaǵdaıdy jasaıdy», - dedi mınıstr.

Osy rette Rýslan Dálenov Katar ınvestorlaryn Qazaqstan ekonomıkasyna ınvestıtsııa salýǵa shaqyrdy.

«Búginde bizdiń qatynastarymyzdy tereńdete túsý álemdegi saýda, saıası jáne ózge de shıelenisterge oraı dúnıejúzilik ekonomıka ósiminiń baıaýlaýyna baılanysty buryn-sońdy bolmaǵan ózektilikke ıe», - dedi ol.

Otyrysqa Katar Memleketiniń Saýda jáne ındýstrııa mınıstri Alı ben Ahmed ál-Kývarı bastaǵan katarlyq delegatsııa qatysty.