Rýslan Dálenov ınvestıtsııalyq salyq saıasaty jaıynda: Salyq tólemeı-aq qoı, keıin beresiń

NUR-SULTAN. QazAqparat - Qazaqstanda jańa ınvestıtsııalyq salyq sasaty engiziledi. Bul týraly búgin halyqpen eseptik kezdesý ótkizgen Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Mınıstrlikke berilgen ınvestıtsııalyq saıasat jónindegi ókilettikti negizge ala otyryp, ınvestıtsııa tartýdyń ekojúıesin qurý aıasynda jumystardy jandandyrý kózdelip otyr. Qazirdiń ózinde túzetýler daıyndalyp jatyr», - dedi ol.

Onyń aıtýynsha, mınıstrliktiń janynda ınvestıtsııalyq zańnama men ahýaldy jaqsartý boıynsha naqty usynystar ázirleý jónindegi Investıtsııalyq shtab jumys isteıdi.

«Biz ázirlegen zańnamalyq túzetýlerde ınvestorlarǵa ekonomıkanyń basym salalaryndaǵy iri jobalar boıynsha turaqty jaǵdaı týǵyzý kózdeledi. Sonymen qatar Salyq kodeksinde ınvestıtsııalyq salyq kredıti qarastyrylǵan. Óıtkeni, kásiporyndar jumysyn bastaǵan kezde ádette olardyń aınalym qarajattary óte az bolady. Buǵan qosa, salyq tóleý qajet. Sol sebepti biz eger ol kásiporyn basym salada bolsa, onda olarǵa ınvestıtsııalq salyq kredıtin usynamyz. Salyqty tólemeı-aq qoı birneshe jyldan keıin beresiń», - dedi R.Dálenov.