Rýmynııada óltirilgen qarashaqaz Qazaqstan ornıtologtaryna qundy aqparattar jiberip turǵan
10:40, 19 Qańtar 2020
NUR-SULTAN. QazAqparat - Ótken jyly Soltústik Qazaqstanda spýtnıktik habar taratqysh taǵylǵan qarashaqazdyń birin boljam boıynsha Rýmynııanyń ońtústik-shyǵysynda brakonerler óltirgen. Bul jaıynda Qazaqstannyń bıologııalyq alýantúrlilikti saqtaý qaýymdastyǵynyń Facebook paraqshasynda jarııalandy, dep habarlaıdy QazAqparat tilshisi.
Bolgarııa qustardy qorǵaý qoǵamdastyǵy (BSPB) men Rýmynııa ornıtologııalyq qoǵamdastyǵy (SOR) mamandarynyń habaryna qaraǵanda, osydan eki kún buryn qarashaqaz Vıktorııa aýylynan habar berip turǵan. Qazirgi ýaqytta sarapshylar men jergilikti bılik ókilderi aqparat jınaýmen aınalysyp jatyr.
Emılııa laqap aty berilgen qus 10 aı boıy birneshe eldiń ornıtologtaryna mıgratsııalyq jyljý týraly qundy aqparat berip turǵan edi.
Buǵan deıin Torǵaı dalasyna jiberilgen urǵashy qulandy brakonerler óltirgen bolatyn. Atalǵan qulan 2018 jyly Ortalyq Qazaqstanda qulandardyń popýlıatsııasyn qalpyna keltirý baǵdarlamasy aıasynda jabaıy tabıǵatqa jiberilgen.