Rýmynııada Dımashtyń fan-klýby onyń kontsertin uıymdastyrǵysy keledi - Nurbah Rústemov

NUR-SULTAN. QazAqparat – Rýmynııada Dımash Qudaıbergenniń fan-klýby bar. Bul týraly QR Syrtqy ister mınıstrligindegi brıfıngte Qazaqstan Respýblıkasynyń Rýmynııadaǵy Elshisi Nurbah Rústemov aıtty, dep habarlaıdy QazAqparat tilshisi.

«Sońǵy bes jyl qatarynan Rýmynııada Qazaqstan fılmderi kúnderi ótip keledi. Ol jaqta tarıhı fılmderimizdi kórgennen keıin kózine jas alyp, «qazaqtardń tarıhyn endi bilip jatyrmyz» degen adamdardy da kórdim», - deıdi Nurbah Rústemov SІM-de ótken brıfıngte.

Sondaı-aq, ol opera juldyzy Nurjamal Úsenbaeva Rýmynııaǵa baryp óner kórsetken kezde jergilikti halyqtyń tamasha áser alǵanyn da tilge tıek etti.

«Dál sol kezde rýmynııalyq hanshaıymdardyń biri «Dál osyndaı talanttardy bizge nege kóp kórsetpeısizder?!» dedi. Endi sol jaqtaǵy Opera jáne balet teatrynyń basshylyǵy kelesi jyly bizdiń eldegi opera ánshilerin shaqyryp otyr», - deıdi ol.

Sondaı-aq, elshiniń aıtýynsha, Rýmynııada Dımash Qudaıbergenniń fan-klýby bar.

«2 myńǵa tarta fan-klýb múshesi bar. Jankúıerler Dımashtyń kelýin surap otyr. Dımash baratyn bolsa – olar kontsertti uıymdastyrýdy óz moıynyna alýǵa daıyn. Dımash – bizdiń brendimiz. Olardyń ótinishin Dımashqa, onyń ata-anasyna aıttym», - deıdi Nurbah Rústemov.

Eske sala ketsek, buǵan deıin Rýmynııada Altyn ordanyń 750 jyldyǵy atap ótiletini týraly jazǵan bolatynbyz.