Rýmynııa depýtaty: Qazaqstandyqtar demokratııalyq quqyqtaryn jaqsy paıdalanyp jatyr
«Rýmynııadan ózimniń áriptesim - rýmyndyq taǵy bir depýtatpen (Sefer Krıstıan - avt.) birge keldik. Túske deıin elordadaǵy tórt birdeı saılaý ýchaskesin araladyq. Shynymyzdy aıtsaq, biz saılaýdyń demokratııalyq jáne transparentti júıesin kórip otyrmyz. Óziniń daýys berý quqyǵyn - demokratııalyq quqyǵyn paıdalaný úshin turǵyndar aýa raıynyń jaısyzdyǵyna qaramastan tańerteńnen beri saılaý ýchaskelerine aǵyldy. Balalarymen birge kelip júrgen jandardy kórdim. Uzyn-sonar kezekter boldy. Basqa da halyqaralyq baıqaýshylarmen birlese, keńese kele saılaýdyń sátti ótip jatqany týraly oıǵa keldik», - dedi rýmyn depýtaty elordada halyqaralyq baıqaýshylardyń baspasóz máslıhatynda.
Valerıı Sterıo óz sózinde Qazaqstandaǵy kezekten tys saılaýǵa qatysýda halyqtyń belsendiligin joǵary ekendigin jetkizdi.
«Bul - saılaý úshin jaqsy kórsetkish. Qazaqstandyqtardyń belsendiligin erekshe atap óter edim. Osy elge birinshi ret jolym túsip tursa da, eldiń damýyna, ómir sapasyna, qala kórkine tańǵalǵanymdy jasyrmaımyn. Bul degenimiz - osy ýaqytqa deıin saıasattyń bul elde durys júrgizilgenin bildiredi. Qazaqstannyń bolashaǵy da jarqyn bolar degen senimdemin. Qazaqstannyń osy baǵyttaǵy jumysy jalpy aımaqtaǵy basqa elderge model bola alady», - dedi baıqaýshy.
Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.
Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.