Rýmynııada prezıdent saılaýy ótip jatyr

<p>ASTANA. KAZINFORM &ndash; Jeksenbide Rýmynııada prezıdenttik saılaý ótip jatyr, dep habarlaıdy Kazinform-nyń <a href="https://www.inform.kz/ru/v-ruminii-proydut-prezidentskie-vibori-3ac16e" target="_blank" rel="noopener">menshikti tilshisi.</a></p>

Saılaý Eýropa jurtshylyǵynyń nazaryn aýdaryp tur. Óıtkeni ońshyl kúshterdiń kandıdaty Djordj Sımıonnyń (AUR partııasy) jeńimpaz bolýy yqtımal. Eger bul saıasatker jeńiske jetse, onda bul Eýropadaǵy ońshyl partııalardy kúsheıtý saıası trendin nyǵaıta túsedi.

Rýmynııa NATO-nyń múshesi jáne Shyǵys Eýropadaǵy EO-nyń mańyzdy strategııalyq memleketi ekenin eskerer bolsaq, saılaý mańyzy arta túsedi. Dj.Sımıon Brıýsselge qatań ustanym ustanýǵa jáne Rýmynııanyń ulttyq múddelerin qorǵaýǵa ýáde berip otyr.

Jeksenbi kúni eń kóp daýys jınaǵan 2 kandıdat 8 jeltoqsanǵa belgilengen ekinshi kezeńge ótedi. Sonymen qatar osy jyldyń 1 jeltoqsanynda parlamenttik saılaý ótedi. Saıası naýqan aldaǵy 4 jylda Rýmynııa úkimetin qandaı partııa nemese partııalar basqaratyndyǵyn aıqyndaıtyn bolady.

Rýmynııanyń saıası júıesi frantsýzdikine uqsaıdy. Prezıdent memleket basshysy, bas qolbasshy sanalady. Prezıdent parlamenttik saılaý nátıjesindegi negizinde premer-mınıstrdi taǵaıyndaıdy. Premer-mınıstr úkimetti basqarady jáne el bıýdjetine jaýap beredi.

Rýmynııada júrgizilgen saýalnama nátıjesinde memleket basshysy bolýǵa múmkindigi joǵary kandıdattar mynalar:

• Rýmynııanyń qazirgi premer-mınıstri Marchel Cholaký;

• Rýmyn birligi úshin ońshyl alıanstyń kóshbasshysy Djordje Sımıon;

• “Rýmynııany qutqaramyz” tsentrıstik lıberaldy odaǵynyń kóshbasshysy Elena Laskonı;

• NATO bas hatshysynyń burynǵy orynbasary Mırcha Djoane;

• Otstavkaǵy general Nıkolae Chýke.

Ekzıt-polǵa negizdelgen birinshi aldyn al nátıje Rýmynııadaǵy saılaý ýchaskeleri jabylǵannan keıin jergilikti ýaqyt boıynsha 21:00-de jarııalanady.