Ruqsatsyz qurylys júrgizýge qatysty 18 laýazymdy tulǵa jaýapkershilikke tartyldy

NUR-SULTAN. QazAqparat - Sońǵy ýaqytta kóp qabatty úıler men áleýmettik obektilerdi ruqsatsyz salý jaǵdaılary jıilep ketti. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev telegram kanalynda jazdy.

Onyń aıtýynsha atalǵan kemshilik memlekettiń jáne jalpy el turǵyndarynyń ortaq máselesi.

«Sondyqtan biz jergilikti atqarýshy organdardyń sáýlet, qala qurylysy jáne qurylys qyzmeti salasyndaǵy jumystaryn turaqty negizde óz baqylaýymyzda ustaımyz. Osylaısha jyl basynan qurylys nysandarynda jalpy somasy 169 mln teńgeden astam 615 ákimshilik quqyq buzýshylyq tirkelgen.

Máselen, Almaty qalasynda turǵyn úı keshenderiniń birinde qurylys jumystary zańsyz júrgizilgen. Ruqsat beretin qujattardy ýchaskeniń menshik ıesi de, qurylys salýshy da usynbaǵan. Qurylys salýshy páterlerdi satyp alý-satý sharttaryn jasasýǵa quqyǵy bolmaǵanyna qaramastan, atalǵan turǵyn úı keshenindegi páterler erkin saýdalanǵan. Tipti, qurylys salýshynyń úleskerlerden aqsha tartýyna ruqsat berilmegen.

Osylaısha, bıyl 28 naýryzda Almaty qala qurylysyn baqylaý basqarmasy keıbir ǵımarattarda qurylys-montajdaý jumystaryn toqtata turý jáne anyqtalǵan kemshilikterdi túzetý týraly usynys berdi. Qazirgi ýaqytta qurylys jumystary toqtatylyp, «Turǵyn úı qurylysyna úlestik qatysý týraly» Zań normalaryn buzǵany úshin qurylys salýshyǵa qatysty hattama toltyryldy», - dep jazdy Qaıyrbek Óskenbaev.

Onyń aıtýynsha qańtar-naýryz aılarynda Indýstrııa jáne ınfraqurylymdyq damý mınıstrliginiń jaýapty komıteti 32 tekserý júrgizip, nátıjesinde 26 nusqama berilgen. Sondaı-aq 18 laýazymdy tulǵa ákimshilik jaýapkershilikke tartyldy.

«Ruqsatsyz qurylys salý máselesiniń ózektiligin eskere otyryp, memlekettik baqylaý jáne obektilerdi paıdalanýǵa qabyldaý júıesin tolyǵymen qaıta qaraıtyn bolamyz. Bul rette baqylaý mehanızmin kúsheıtýdi josparlap otyrmyz. Onyń ishinde, obektiniń paıdalanýǵa berý boıynsha daıyndyǵyn rastaý úshin nysandardy qabyldaý barysynda memlekettik sáýlet-qurylys baqylaý organdarynyń mindetti qatysýy qamtamasyz etiletin bolady», - dep tolyqtyrdy ol.

Eske salsaq, buǵan deıin Memleket basshysy Nur-Sultan men Almaty ákimderine turǵyn úı keshenderi janynan bıik úılerdi tyǵyz salýdy toqtatýdy tapsyrǵan edi.