Ruqsat etilmegen jerge qoqys tókkeni úshin salynatyn aıyppul ósedi
Úkimet basshysy jergilikti atqarýshy organdarǵa 1 qarashaǵa deıin Kommýnaldyq qaldyqtardy basqarý baǵdarlamalaryn bekitýdi tapsyrdy. Buǵan qosa, ákimdikter jyl sońyna deıin ruqsat etilmegen qoqys úıindilerin 2 esege qysqartýy kerek.
«Ekologııa mınıstrligi Іshki ister mınıstrligimen birlesip, ruqsat etilmegen jerlerde qoqys tastaǵany úshin ákimshilik jaýapkershilikti kúsheıtý úshin zańnamalyq túzetýler engizsin. Ákimshilik aıyppuldardy ulǵaıtý qajet, zań buzý faktileri qaıtalansa, soǵan sáıkes salynatyn aıyppul mólsheri de ósýi kerek. Sondaı-aq, Ekologııa mınıstrligi qaldyqtardy bólip jınaýdy, olardy ýtılızatsııalaý men qaıta óńdeýdi engizýdiń halyqaralyq tájirıbesin zerdelep, qoldanystaǵy zańnamaǵa túzetýler ázirleýi qajet», - dedi Álıhan Smaıylov Úkimet otyrysynda.
Premer-Mınıstr qaldyqtardy joıýdyń qazirgi júıesi, onyń ishinde tarıf máselesi esh syn kótermeıtinin aıtyp, jyl sońyna deıin jańa tásilderdi ázirleýdi tapsyrdy.
«Ekologııa mınıstrligi ákimdiktermen birge 1 jeltoqsanǵa deıin eýropalyq ozyq tájirıbeni eskerip, qaldyqtardy joıyp, qaıta óńdeıtin jańa zaýyttar salý boıynsha synystar ázirleýi tıis. Ol úshin tıisti zańnamalyq baza bar. Máselen, Shvetsııa, Frantsııa, Japonııa sııaqty álemniń keıbir elderinde zaýyttar úlken jerdi alyp otyrǵan joq, onda tútin men ıis shyǵarmaıtyn tehnologııalar qoldanylady. Ekologııa, Oqý-aǵartý, Ǵylym mınıstrlikteri jyl sońyna deıin qoqyspen jumys isteý mádenıeti máselelerin ázirlep, ony balabaqshadan bastap ýnıversıtetke deıin oqý baǵdarlamalaryna engizýi kerek. Qaldyqtardy bólip jınaý men qaıta óńdeý is-áreketimiz ben minez-qulqymyzdyń mańyzdy bóligine aınalýy qajet», - dedi Álıhan Smaıylov.
Buǵan deıin Premer-Mınıstr Qazaqstanda jyl saıyn 4,5 mln tonnadan astam qatty turmystyq qaldyqtar jınalatynyn, elimizdiń qoqys joıýdyń ábden eskirgen ádisin qoldanatynyn aıtqan edi.