«Rýhanı jańǵyrýdy» júzege asyrýǵa barlyq qurylym qatysýy kerek - Káletaev

ASTANA. QazAqparat - Elordada «Rýhanı jańǵyrý» baǵdarlamasy: iske asyrý nátıjeleri men damý bolashaǵy» taqyrybynda óńirlerdiń qatysýymen semınar-keńes bastaldy, dep habarlaıdy QazAqparat. 

Qoǵamdyq damý mınıstrligi uıymdastyrǵan bul jıynnyń ashylýyna QR Prezıdenti Ákimshiligi ishki saıasat bóliminiń meńgerýshisi Aıda Balaeva, QR Qoǵamdyq damý mınıstri Darhan Káletaev, QR Aqparat jáne kommýnıkatsııa mınıstri Dáýren Abaev, QR Bilim jáne ǵylym mınıstri Erlan Saǵadıev jáne QR Mádenıet jáne sport vıtse-mınıstri Aqtoty Raıymqulova qatysty. 

Semınar-keńesti ashqan Qoǵamdyq damý mınıstri Darhan Káletaev Memleket basshysynyń bastamasymen qolǵa alynǵan «Rýhanı jańǵyrý» baǵdarlamasy halyqtyń ótkenin, búginin jáne bolashaǵyn baılanystyrýǵa baǵyttalǵan aýqymdy platforma ekenin atap ótti. 

«Bul baǵdarlama barsha halyqqa arnalǵan jáne onda qoǵam ómiriniń barlyq salasy qamtylǵan. Sondyqtan, baǵdarlamaǵa barsha qurylymdardyń belsendi qatysýyn qamtamasyz etýimiz qajet», - dedi Darhan Káletaev. 

Sondaı-aq, mınıstr «Rýhanı jańǵyrý» baǵdarlamasyn júzege asyrýda áleýmettik jelilerdiń áleýetin keńinen paıdalaný, Sarapshylar keńesin tartý, kreatıvti toptarmen ózara is-qımyldy kúsheıtý syndy birqatar usynys aıtty. 

Semınar-keńes jumysy 29 qyrkúıekke deıin jalǵasady. Shara aıasynda «Týǵan jer», «100 jańa esim», «Qazaqstannyń kıeli jerleriniń geografııasy», «Latyn álipbıine kóshý» jáne «Qazaq tilindegi 100 jańa oqýlyq» taqyryptarynda paneldik sessııalar ótkizý josparlanǵan.