Rýhanı jańǵyrý: Jetisý jurtshylyǵy jazýshylarmen júzdesti

ASTANA. QazAqparat - Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń maqsaty men múddesin qalyń buqaraǵa jetkizip, keń kólemde nasıhattaý jumysyna erekshe mán berilip otyr. Jetisý jurtshylyǵy da rýhanı jańǵyrýǵa ózindik únderin qosyp, mańyzdy basqosýar men keleli kezdesýlerge belsene qatysýda.

Kúni keshe qalyń qaýym «Aqyndar men batyrlar eli» dep úlken qurmetpen ataıtyn Jambyl aýdanynyń ortalyǵy Uzynaǵash aýylyndaǵy aýdandyq kitaphanada osy taqyrypta taǵy bir taǵylymdy júzdesý ótkizdi, dep habarlaıdy «Aıqyn» gazeti .

Ádebıetsúıer qaýym esimderin jatqa biletin, kitaptaryn jastana jatyp oqıtyn elge belgili jazýshylar Marhabat Baıǵut pen Nesipbek Dáýtaıuly Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynyń el bolashaǵy úshin úlken mindetter júkteıtinin jurtshylyqqa jetkizýge tyrysty.

Ońtústik Qazaqstan jáne Jambyl oblysynan jyr alybynyń týǵan jerine arnaıy ári ardaqty maqsatpen kelgen qalamgerlermen kezdesýge aý­dandyq me­keme, bólim basshylary men qoǵamdyq uıymdar jetekshileri qa­tysty. Mádenıet pen ádebıet sala­sy­nyń adamdary súıikti jazý­shylarmen júzdesýge bir kisideı jınaldy. Kezdesýdi ótkizýge muryndyq bolǵan Qazaqstan halqy Assambleıasy.

Birinshi bolyp sóz alǵan aýdan ákiminiń orynbasary Qanybek Aıtjanov Elba­synyń óz elimizde ǵana emes, alys-jaqyn shet memleketterdegi memleket jáne qoǵam qaıratkerleriniń, saıasatkerlerdiń joǵary baǵasyn alǵan baǵdarlamalyq maqalasy­nyń mańyzy men maqsat-muraty jaıynda egjeı-tegjeıli baıandaı kele, ońtústikten at arytyp jetken jazýshylarǵa sóz berdi.
Jazýshy, jýrnalıst, aýdarmashy, Qa­zaqstannyń eńbek sińirgen qaı­ratkeri, Halyqaralyq «Alash» syı­lyǵynyń laýreaty, «Qurmet» ordeniniń ıegeri, Ońtústik Qazaqstan oblysynyń Qurmetti azamaty, Qazaqstannyń Qurmetti jýr­nalısi Marhabat Baıǵut rýhanı jańǵyrý­dyń qalyń buqaramen birge qolyna qalam ustaǵan qaýymǵa da sony serpilis ákelgenin aıtty. Mun­daǵy basty mindet te rýhanııat sala­synda ter tógip júr­genderge júkte­letindigin, soǵan saı baǵdarlamalyq maqa­lada aıtyl­ǵandardy is júzine asyrýǵa bar­ly­ǵymyz at salysýymyz qajettigine de toqtaldy.

Jazýshy, Halyqaralyq «Alash» ádebı syılyǵynyń laýreaty, Qa­zaqstannyń eńbek sińirgen qaıratkeri, «Jambyl» ádebı-kópshilik jýrna­lynyń bas re­daktory, Qazaqstan Jazýshylar odaǵy Jambyl oblystyq fılıalynyń dırek­tory Nesipbek Dáýtaıuly da áriptesiniń tushymdy oıyn tolyqtyryp, odan ary tolǵady. Elimizdiń Tuńǵysh Prezı­dentiniń halyqty rýhanı jańǵyrtýda­ǵy sarabdal saıasatkerligin, kóregen kóshbasshylyǵyn, ult múddesin kózde­gen batyl bastamalaryn keńinen qozǵady.

Jazýshylarmen júzdesýde Elba­synyń el bolashaǵyn baıandy etýge baǵytalǵan baǵdarlamasynyń ultymyz úshin asa mańyzdylyǵy, ónegesi óreli ekendigi jaıly paıymdy pikirler men tujyrymdy oılar ortaǵa salyndy. Qos qalamgerdiń bastamasy aldaǵy kezde de jalǵasyn tapsa jaqsy bolar edi degen usynystar aıtyldy. Shyndyǵynda, Elbasynyń baǵdarlamalyq maqalasyn atqarýshy bılik ókilderinen góri, esimderi el jadynda jattalǵan, myń­daǵan oqyrmandary asyǵa kútetin rýhanııat maıdanynyń naǵyz sardar­lary bolyp sanalatyn myqty aqyn-jazýshylar nasıhattasa, qazaqtyń baı tilimen kestelep jetkizse, halyq ony durys qabyldar edi. Keleshekte ulty­myz tabysty bolýy úshin árbir qa­zaqstan­dyq básekege qabiletti, sana-sezimi joǵary, bilimdi, saýatty bolýy tıis. Ulttyq kodty, mádenıetti saqtap, jańa zaman jetistikterin boıǵa sińire otyryp, jalpyadamzattyq qundylyq­tarmen rýhanı baıýymyz qajet. Qazaq tilin birtindep latyn álipbıine kóshirý, «Jańa gýmanıtarlyq bilim. Qazaq tilindegi 100 jańa oqýlyq» jobasy, jalpyulttyq patrıotızmdi dáripteıtin «Týǵan jer» baǵdarlamasy, ulttyq mádenıetimizdiń ozyq úlgilerin kór­setetin «Qazaqstandaǵy 100 jańa esim» jobasy bizderdi rýhanı turǵyda jańa belesterge bastary sózsiz.

Qurmetti qonaqtardan keıin sóz alǵan belgili jýrnalıst Kúmisjan Baıjan, aýdandyq ardagerler keńesiniń tóraǵasy Qyrǵyzbek Atageldıev, aqyn Gúlnar Ómirzaqova Elbasynyń baǵ­darlamalyq maqalasyna baılanysty oı-pikirlerin bildirdi.