«Rýhanı jańǵyrý» jalpyrespýblıkalyq jastar aktsııasy Kaspıı jaǵasynda qorytyndylandy
Aýqymdy sharaǵa qatysqan sheteldik meımandar Elbasynyń «Rýhanı jańǵyrý» baǵdarlamasymen tanysyp, zor qyzyǵýshylyq tanytty, dep habarlaıdy 24.kz .
Bes memlekettiń belsendi jastary ózara baılanysty arttyrý maqsatynda birqatar jobany júzege asyrýǵa ýaǵdalasty. Olar keleshekte Túrki akademııasymen birlese ashylatyn lagerde qazaq tilin úırenbekshi. Kaspıı mańy elderi jastarynyń Aqtaýda bas qosýyna Nursultan Nazarbaevtyń Ázerbaıjanǵa jumys saparynda bergen tapsyrmasy negiz boldy. Ótken senbiden bastaý alǵan sharanyń barlyq kezeńinde Elbasy maqalasy keńinen nasıhattaldy.
«Adam sanasyn jańǵyrtýǵa arnalǵan «Rýhanı jańǵyrý» baǵdarlamasynyń baǵyty unady. Ótkensiz keleshek joq. Jastar tarıhyn, dástúrin jańǵyrtý arqyly bolashaqqa qadam basady. Eliniń taý-tasyn tanıdy. Týǵan jeriniń damýyna kúsh salady. Bul baǵdarlama eliniń damýyna atsalysatyn jastarǵa jol kórsetetin baǵdarsham ispettes», - deıdi Ázerbaıjannan kelgen Alekper Mustafaev.
Baýyrlas elderdiń ulandary bas qosqan jıynda jastar saıasaty máseleleriniń túıindi tustary talqylandy. Sondaı-aq álemdik deńgeıdegi is-sharalar ótkizýde jınaqtaǵan tájirıbeleri ortaǵa salyndy. Qazaq-Ázerbaıjan jastarynyń ekijaqty áriptestik memorandýmǵa qol qoıýy forým mańyzdylyǵyn arttyra tústi. Forýmǵa qatysýshylar qala kúnine oraı ótken «Aqtaý - arman qala» atty jas aqyndar aıtysyn tamashalap, qazaqtyń aqyndyq ónerimen etene tanysty. Al senbi-jeksenbi kúnderi «Otpan taý» tarıhı-mádenı keshenine zııarat quryp, aımaq basshysynyń kýbogyna arnalǵan halyqaralyq pankratıonda jerlesterine jankúıer boldy.
Sonymen 15 qyrkúıekte elimizdiń barlyq óńirinde bastaý alǵan «Rýhanı jańǵyrý» jalpyrespýblıkalyq jastar aktsııasy Kaspıı jaǵasynda qorytyndylandy. Memleket basshysynyń «Bolashaqqa baǵdar: rýhanı jańǵyrý» atty maqalasyn qoldaý jáne qoǵamdyq sanany jańǵyrtý úrdisine jastardy belsendi túrde jumyldyrýǵa shaqyrǵan aktsııa tórt baǵytty qamtydy.
QR Din isteri jáne azamattyq qoǵam mınıstrligi Jastar saıasaty departamentiniń dırektory Ǵabıdolla Ospanqulovtyń aıtýynsha, basty maqsat - qazaq salt-dástúrin, tarıhqa degen qurmetin kórsetý. "Bilim» degen saıysta olar ózderiniń «Rýhanı jańǵyrýdyń» ıdeıalaryn qanshalyqty túsinetindigin vıktorınalar ótkizý arqyly bildirdi. «Taǵzym» týraly baǵytta bizdiń rýhanı jáne mádenı, tarıhı oshaqtarymyzǵa baryp, tazalyq jumystaryn júrgizdi. «Asar» aktsııasynda olar az qamtylǵan otbasylarǵa baryp, túrli kómek kórsetý sııaqty isterimen úles qosty".
Jahan jastarynyń forýmy men qala kúnin qamtyǵan is-sharalar tizimin «Gakku daýysy» mýzykalyq festıvali túıindedi. Teńiz jaǵasyna serýenge shyqqan kópshilik qazaqtyń tanymal ánshileriniń ónerin jandy daýysta tyńdap, kóterińki kóńil-kúımen tarqasty.