Rýhanı jańǵyrý ult rýhanııatyn jańa turǵydan tanýǵa jol ashady
Jumysqa barlyq ortalyq jáne jergilikti atqarýshy organdar men azamattyq qoǵam ınstıtýttarynyń ókilderi tartyldy. Búgin Aqordada komıssııa jetekshisi, Prezıdent Ákimshiliginiń basshysy Ádilbek Jaqsybekovtiń tóraǵalyǵymen Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń ekinshi otyrysy ótip, onda aralyq kezeńde atqarylǵan jumystardyń esebi tyńdaldy. Budan bólek, jıyn barysynda «Rýhanı jańǵyrý» baǵdarlamasyn iske asyrý aýqymynda ortalyq jáne jergilikti memlekettik organdar atqarǵan jumystardyń nátıjelerin talqylady. Otyrysta negizgi baıandamany QR Premer-Mınıstr Keńsesi basshysy Nurlan Aldabergenov pen Almaty qalasynyń ákimi Baýyrjan Baıbek jáne Qaraǵandy oblysynyń ákimi Erlan Qoshanov jasaǵan bolatyn. Sondaı-aq, atqarylǵan jumystyń negizgi nátıjeleri, tujyrymdamalyq ustanymdar men qyzmetti odan ári uıymdastyrýdyń naqty sharalary aıasynda, latyn qarpine kóshý, «Jańa gýmanıtarlyq bilim. Qazaq tilindegi 100 jańa oqýlyq», «Týǵan jer», «Qazaqstannyń kıeli jerleriniń geografııasy», «Jahandaǵy zamanaýı qazaqstandyq mádenıet», «Qazaqstannyń 100 jańa tulǵasy» jobalary boıynsha, jumys toptarynyń jetekshileri esep berdi.
Talqylaý barysynda «Rýhanı jańǵyrý» baǵdarlamasyn, onyń ishinde arnaıy jobalardy júzege asyrý jónindegi usynystar da qaraldy. Otyrys qorytyndysy boıynsha birqatar naqty sheshimder qabyldanyp, memlekettik organdar men jumys toptarynyń jetekshilerine tapsyrmalar berildi.
Máýlen Áshimbaev, Májilis depýtaty:
Búgingi otyrys mazmundy ótti deýge bolady. Jalpy latyn álipbıine kóshý, Týǵan jer, kıeli jerler, ulttyq mádenıetimizdi shetelderde tanytý, qazaq tiline 100 tanymal oqýlyqty aýdarý baǵyttary boıynsha ázirlengen josparlar komıssııa músheleriniń kóńilinen shyqty. Bul josparlar jan-jaqty oılastyryp, egjeı-tegjeıli pysyqtalyp, daıyndalǵan. Endi osy qujatqa sáıkes Ulttyq komıssııa, memlekettik organdar, zııaly qaýym ókilderi jumystar júrgizetin bolady. Jalpy búgingi otyrystyń negizgi qorytyndysy - naqty josparlar qarastyrylyp, maquldandy
Erlan Qoshanov, Qaraǵandy oblysynyń ákimi:
Aıryqsha atap ótkim keletini Qaraǵandy oblysynyń jurtshylyǵy men qoǵam belsendileri, zııaly qaýym ókilderi jáne el kásipkerleri mundaı bastamany óte qatty qoldap, qýattaýda. Aımaqtaǵy atqaminer azamattar men kásipkerler «Týǵan jer» baǵdarlamasyn júzege asyrý úshin júz mıllıon teńgeden astam qarajat jınap, salamatty ómir saltyn nasıhattaýǵa sep bolatyn túrli áleýmettik nysandardy salýǵa qyzý kirisip ketkeni sózimdi aıǵaqtaı túsedi. Onyń ústine sporttyq nysandy salyp eldi mekenge syıǵa tartýmen shektelmeý qajettigin jalpy qoǵam sezinip otyr. Jappaı qolǵa alynǵan mundaı ıgilikti sharanyń astarynda el men jerge, Otanǵa degen sheksiz qurmet pen baıtaq Qazaqstanǵa degen sheksiz patrıottyq sezim jatqany sózsiz. Demek, memlekettik deńgeıde júzege asyrylyp jatqan bul joba jastardyń boıynda otansúıgishtik qasıet qalyptastyratyny aqıqat. Árıne, Elbasy maqalasynda arnaıy aty atalǵan Ulytaý óńirine qatysty jobalardy damytý, jetildirý jumystary qyzý qolǵa alynatyndyǵyn da aıryqsha atap ótkim keledi. Óıtkeni, Ulytaý óńirinde osy kúnderdiń ózinde aýqymdy jumystar bastalyp ta ketti.
Arystanbek Muhamedıuly, Mádenıet jáne sport mınıstri:
Qoǵamdyq sanany jańǵyrtý baǵdarlamasyn tabysty júzege asyrar bolsaq, Elbasymyz aıtqandaı, Qazaqstannyń bolashaǵy múldem basqasha bolady. Óıtkeni, ár halyqty onyń rýhanı baılyǵy men sana-sezimi qalyptastyrady. Al bul baǵdarlama bizdiń sana-senimimizdiń joǵarylaýyna, óz qundylyqtarymyzdy saqtaýǵa septigin tıgizip, dúnıejúzinde qazaq kim degende «men» dep maqtanyshpen aıtatyndaı jaǵdaıǵa jetkizýi tıis. Sonymen qatar, «Qazaqstannyń kıeli jerleriniń geografııasy» jobasy aıasynda elimizdiń óńirlerinde jastar elimizdiń tarıhı aımaqtaryna ekspedıtsııalar uıymdastyrý ústinde. Al Mádenıet jáne sport mınıstrligi bolsa jaz aıynda 7 baǵytqa arnalǵan búkil qazaqstandyq ekspedıtsııa daıyndaýda
Baýyrjan Baıbek, Almaty qalasynyń ákimi:
Búgin men josparda turǵan 2 jańa bastama jaıynda aıttym. Buryn almatylyqtar, jalpy qazaqstandyqtar «Azııa daýysy» jobasy týraly kóp aıtatyn. Sondyqtan biz Medeý, Shymbulaqty kórsetý, jalpy Almatynyń týrıstik áleýetin kóterý úshin «Azııa juldyzy» degen jobany bastamaqpyz. Qyrkúıek aıynda, ózderińiz biletindeı, árbir úshinshi demalys kúni Almaty qalasy kúni toılanady. Sol kúni Medeý muz aıdynynda osyndaı festıvaldi ótkizý arqyly ózimizdiń mádenıetimizdi Azııaǵa pash etetin bolamyz. Munan bólek, «Qazaqfılm» kınostýdııasy aýmaǵynda bos jatqan jerde etnolend jobasy qolǵa alynady. Ol jerde qala turǵyndary, aımaqtardan kelgen azamattar, sheteldik qonaqtar Almatynyń myń jyldyq tarıhymen tanys bolady. Belgili ǵalymymyz Karl Baıpaqov Almaty qalasynda túrli qorǵandardyń óte kóp ekendigin aıtqan bolatyn. Olardyń kóbi jeke kásipkerlerdiń, bankterdiń ıeliginde. Biz sol jerlerdi memleket menshigine qaıtaryp, ashyq aspan astyndaǵy mýzeıler jasaıtyn bolamyz.
Altaı Kólginov, Batys Qazaqstan oblysynyń ákimi:
Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda Batys Qazaqstan aımaǵyndaǵy mádenı qundylyqtardy qaıta jańǵyrtý men ony el ishinde keńinen nasıhattaý maqsatyndaǵy jospar, jobalarymyzdy komıssııa músheleriniń aldynda tanystyryp, talqyladyq. Óıtkeni, bizdiń óńirde el tarıhyn tanyp, bilýge qushtar jandarǵa kórsete alatyndaı baı tarıhymyz ben kóne jádigerlerimiz az emes. Sol sııaqty, «Týǵan jer» baǵdarlamasyndaǵy mindetterdi oryndaý úshin aımaqtardan metsenattar men demeýshiler izdestirilýde. Qoǵamdy aýyzbirlik pen uıymshyldyqqa, tatý-tátti tirshilik keshýge úndeıtin ártúrli áleýmettik mańyzy zor jıyn, sharalar ótkizýge belsendi ári ultjandy azamattar tartylýda. Máselen, bul baǵyttaǵy ıgi isimizdiń biri - Alash qozǵalysynyń 100 jyldyǵyna oraı, aımaq ortalyǵynan arnaıy «Alash» mýzeıin ashýdy josparlaý ústindemiz. Mundaı oıdy óńir kásipkerleri men azamattary biraýyzdan quptady. Bári oıdaǵydaı bolsa, jyl sońyna qaraı «Alash» mýzeıin el tamashalaıtyn bolady dep josparlap otyrmyz. Ol úshin óńirde óz zamanynan beri murty buzylmaı saqtalǵan ǵımarat ta, onyń ishin toltyrýǵa kóne jádigerlik buıymdar da jetkilikti.