Rýhanı jańǵyrý: OQO-da halyqaralyq deńgeıdegi jobalar júzege asyrylady

ShYMKENT. QazAqparat - Ońtústik Qazaqstan oblysynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda kóptegen respýblıkalyq jáne halyqaralyq jańa jobalardy júzege asyrý josparlanyp otyr. Bul týraly Ońtústik Qazaqstan oblysynyń ákimi Janseıit Túımebaev málim etti, dep habarlaıdy QazAqparat tilshisi.

Aımaq basshysynyń aıtýynsha, mamyr aıynda Ońtústik Qazaqstan oblysynda «Ordabasyǵa oralý: Bereke basy - birlik» taqyryptarynda úlken is-sharalar ótkiziledi. Sondaı-aq, ár jyl saıyn «Týǵan jerge taǵzym: Ordabasy kóktemi» atty jastar forýmy uıymdastyrylmaq. Budan bólek, «Aqsý-Jabaǵylynyń alaýy, Shubaıqyzyldyń jalaýy» qyzǵaldaq festıvali, «Qymyzmuryndyq», «Safari Shardara», «Qaýyn fest» syndy buryn sońdy bolmaǵan jańa baǵyttaǵy sharalardy júzege asyrý josparlanýda.

«Alqyzyl qyzǵaldaqtyń eń ádemileri Túlkibastaǵy Aqsý-Jabaǵylyda jáne Shubaıqyzyl dep atalatyn teńdesi joq tóbede ósedi. Qyzǵaldaq - oblysymyzdyń sımvoly, ol «Qyzyl kitapqa» engen, ıaǵnı aıyryqsha qorǵaýdy qajet etedi. Sondyqtan, osy maqsatta jyl saıyn sáýir aıynda «Qyzǵaldaq festıvalin» ótkizetin bolamyz. Sondaı-aq, óńirimizdegi bilim uıalarynan túlep ushqan túlekterdi jańa ómirge Ordabasy taýynan attandyramyz. Eldiń rýhanı sýsynyn qandyrý maqsatynda óńirde «Halyqaralyq óner festıvalin» ótkizý dástúrge aınalady. Oǵan elimizben qatar sheteldik ónerpazdar da qatysady. Ulttyq ónerimizdi qoldaý maqsatynda folklorlyq janr túrlerinen de baıqaýlar ótkiziledi. Bıylǵy jyly «Qymyzmuryndyq» is-sharasyn Báıdibek aýdanynyń taý baýraıynda ótkizý josparlanyp otyr», - dedi Janseıit Qanseıituly.

 

Óńir basshysynyń aıtýynsha, oblysymyzda aı saıyn «Ońtústiktiń dara tulǵalary» taqyrybynda elge tanymal zııaly qaýym, ǵalym, qoǵam, memleket qaıratkerleriniń jastarǵa arnalǵan dáristeri uıymdastyrylady.



Aıta keteıik, KSRO Sýretshiler odaǵynyń 12 múshesi Tólebı aýdanyna qarasty Qasqasý aýylynan shyqqan. Osyǵan oraı, Tólebı aýdanynda halyqaralyq, respýblıkalyq dárejedegi sýretshiler men músinshilerdiń zamanaýı óner bıenallesin ótkizý josparlanýda. Sondaı-aq, tamyz aıynda jyl saıyn «Qaýyn fest» al, qyrkúıek aıynda «Agro fest» festıvalin ótkizý de jyl saıynǵy dástúrge aınalady.

 

Budan bólek, oblystyń týrıstik áleýetin damytý maqsatynda jyl saıyn qazan aıynda «Safari Shardara» sharasy bastalady. Qyzylqum óńirinde, Syrdarııa ózeniniń boıynda, Shardara teńiziniń jaǵalaýlarynda seıil-serýen, safarı, sý jarystary, kúzgi djaz, gıtara festıvalin uıymdastyryp, ólkemizdi sheteldikterge tanystyrý kózdelip otyr.

 

Al, qys aılarynda oblysta «Salbýryn - saıatshylyq merekesi», «Qansonarda búrkitshi shyǵady ańǵa» atty is-sharalar uıymdastyrylady. Onyń maqsaty - jas urpaq boıyna babalar saltyn sińirip, saıatshylyqty, ulttyq sport túrlerin nasıhattaý bolmaq. Osy is-sharalar aıasynda búrkit salý, tazy júgirtý, qusbegilikten saıystar ótkiziledi. Bul sharalardy halyqaralyq deńgeıge kóterip, ár jyl saıyn sheteldik týrıster arnaıy kelip tamashalaıtyndaı dárejege jetkizý kózdelip otyr.
Sonymen qatar elimizdiń rýhanı astanasy - Túrkistan qalasy men Otyrar aýdanynda «Ulttyq qolóner - uly mura» is-sharasyn ótkizý josparda bar.