Rýhanı jańǵyrý: Ertis óńirinde jańa joba bastaý aldy
03:11, 05 Qańtar 2018
ASTANA. QazAqparat - Ertis óńirinde «Rýhanı jańǵyrý» baǵdarlamasy aıasynda tuńǵysh ret «Ertis Star» jobasy qolǵa alyndy, dep habarlaıdy pavlodarnews.
Bul týraly agenttikke oblystyq mádenıet, arhıvter jáne qujattama basqarmasynyń basshysy Ardaq Raıymbekov aıtty.
«2017 jyly 22-jeltoqsan kúni alǵash ret jobanyń ashylýy Ýspen aýdanynyń Tobyljan aýylynda ótti. Munda barlyǵy 35 adam irikteldi. Olardyń arasynda 23 jastaǵy aýyl turǵyny Asqar Dúısekeev pen 13 jastaǵy oqýshy Sabrına Dostova estrada janrynda jáne dombyramen halyq ánin oryndaǵan mádenıet úıiniń jas mamany Jaýyn Qunanbaı erekshe kózge tústi», - deıdi Ardaq Raıymbekov.
Baıqaýǵa boıynda talanty bar 12-29 jas aralyǵyndaǵy kez kelgen jas qatysa alady. Án, kúı, mýzyka, bı jáne basqa janrdaǵy daryn ıelerin aıqyndaıtyn oblystyq «ErtisStar» jobasy óńirdegi barlyq aýdandar men úsh qalany qamtıdy.