«Rýhanı jańǵyrý» bir-eki jylǵa arnalǵan baǵdarlama emes - Darhan Myńbaı

ORAL. QazAqparat - Elbasynyń «Rýhanı jańǵyrý» baǵdarlamasynyń máni tereńde. Oǵan jete mán berilýi qajet. Bul týraly Batys Qazaqstan oblysyna jumys saparymen kelgen Qazaqstan halqy Assambleıasy tóraǵasynyń orynbasary Darhan Myńbaı Dostyq úıindegi keńeıtilgen otyrysta málim etti, dep habarlaıdy «QazAqparat» tilshisi.

Onyń aıtýynsha, «Rýhanı jańǵyrý» - bir-eki jylǵa arnalǵan baǵdarlama emes. Sol sebepti sanǵa emes, sapaǵa nazar aýdaratyn mezgil jetti. Endi dóńgelek ústel, túrli jınalysty azaıtyp, barynsha sapaly, jurtshylyq úshin paıdaly is-sharalardy uıymdastyrý kerek. Jalpy, osyǵan oraı Batys Qazaqstan oblysynda da belsendilik artyp, serpilis bolatyny anyq.

Darhan Myńbaı Assambleıa aldynda turǵan maqsat-mindetterge toqtalyp, osy oraıda batysqazaqstandyqtardyń jumysyna sáttilik tiledi.

Oblys ákimi, Qazaqstan halqy BQO assambleıasynyń tóraǵasy Altaı Kólginovtiń atap ótkenindeı, óńirde toqsannan astam ult ókilderi tatý-tátti ómir súrip keledi. Oblystyq Assambleıa quramynda 127 múshe, 20 myńnan astam belsendi, 52 etnomádenı ortalyq bar. Assambleıanyń 52 múshesi túrli deńgeıdegi máslıhat depýtattary retinde de óńirdiń qoǵamdyq-saıası ómirine belsene aralasýda.  2016 jyly Elbasy tapsyrmasyna sáıkes Oralda ashylǵan Dostyq úıinde oblystyq Assambleıa men onyń qurylymdyq bólimsheleriniń, barlyq etnomádenı ortalyqtardyń jumys jasaýy úshin tolyq jaǵdaı bar. Óńirde jyl saıyn túrli etnos kúnderi turaqty uıymdastyrylyp, túrli ult ókilderiniń halyqtyq meıramdary atalyp ótilýde. Bıyl assambleıa «Rýhanı jańǵyrý» baǵdarlamasy aıasynda alty baǵyt boıynsha jıyrmadan astam jobany qolǵa aldy. «100 jańa esim» jobasyna sáıkes jumys toby qurylyp, 305 úmitker iriktelip, respýblıkalyq komıssııaǵa joldandy.

Jıynǵa qatysqan etnomádenı ortalyqtardyń jetekshileri de óz usynys-pikirlerin bildirdi.

Darhan Myńbaı jumys sapary barysynda Oraldaǵy birqatar mekeme-kásiporyndarda bolyp, ondaǵy qoǵamdyq kelisim keńesteriniń jumysymen tanysty.