«Rýhanı jańǵyrý» baǵdarlamasyn júzege asyrýda basty basymdyq balalar men jastarǵa beriledi - mınıstr
«Kelip túsken usynystar eskerilip, 2021 jylǵy respýblıkalyq jospar jınaqtalyp jatyr. Olardyń barlyǵyn birdeı tizip otyrmaı, basty tujyrymdamalyq baǵyttaryna nazar aýdaraıyn. Eń birinshi másele – bul is-sharalar burynǵydaı jalpyhalyqtyq sıpatta emes, jas erekshelikterine oraı, ár toptyń rýhanı qajettiligin eskere otyryp, maqsatty ári ataýly túrde júzege asyrýǵa negizdelgen. Sonyń ishinde, basty basymdyq balalar men jastarǵa berilip otyr. Kelesi bir erekshelik – olardyń barlyǵy, qurmetti Qyrymbek Eleýuly, ózińizdiń maqalańyzda kórsetilgen ult úshin asa mańyzdy úsh murat – bilim, densaýlyq jáne eńbek aınalasyndaǵy is-sharalar kesheninen qalyptasatyn bolady», - dedi mınıstr Memlekettik hatshy Qyrymbek Kósherbaevqa qarata.
Mysaly, mınıstrdiń aıtýynsha, olardyń qatarynda básekege qabiletti, jan-jaqty damyǵan jas urpaqty qalyptastyrýǵa arnalǵan «Ulttyq tárbıe», jastardyń ǵylymı jetistikteri týraly «Aqyldy urpaq», eńbek adamy bolýǵa shaqyrǵan «Proforıentatsııa», kitap oqıtyn jastardyń sanyn arttyrý, joǵary estetıkalyq talǵamyn qalyptastyrý, bos ýaqytty tıimdi josparlaý sııaqty is-sharalar qamtylǵan «Tárbıe-tanym» jobalary bar.
Eske sala keteıik, Memlekettik hatshy Qyrymbek Kósherbaevtyń tóraǵalyǵymen ótken komıssııa otyrysynda «Rýhanı jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaıy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategııalyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhanı-adamgershilik jáne patrıottyq tárbıe berý, Eńbek adamyn qalyptastyrý, Aýyldy túletý sııaqty t.b keshendi is-sharalar qamtylady. Memlekettik hatshy otyrysty qorytyndylaı kele, «Rýhanı jańǵyrý» baǵdarlamasynyń basym baǵyttary boıynsha jumysty odan ári jandandyrý boıynsha naqty tapsyrmalar berdi.