«Rýhanı jańǵyrý» baǵdarlamasy tyń ujymdyq monografııalarmen tolyqty
Tyń monografııalar Elbasynyń «Rýhanı jańǵyrý» baǵdarlamasyn júzege asyrý maqsatynda jaryqqa shyqqan. Monografııalardyń tusaýkeser rásiminde Eýrazııa ıntegratsııa ınstıtýtynyń dırektory Ǵanı Nyǵmetov týyndylarda memlekettiń kommýnıkatsııalyq jáne áleýmettik saıasatyna muqııat ári jan-jaqty zertteýge umtylys jasalǵanyn erekshe atap ótti. Alǵash ret ǵylymı aınalymǵa «ıntegratsııalyq-kommýnıkatsııalyq saıasat» degen termın engizilip, ony tıimdi túrde iske asyrý tájirıbesi kórsetilgen.
«Bul eńbek «Rýhanı jańǵyrý» baǵdarlamasyn tájirıbelik turǵyda túsindiredi. Eńbekke kirispes buryn osynaý monografııalardy jazatyn ǵalymdar iriktelgen bolatyn. Bul týyndylar memlekettik organdardyń «Rýhanı jańǵyrý» keńselerine jiberiledi. Óńirlerdiń ishki saıasat basqarmalaryna jetip te qoıdy», - deıdi Eýrazııa ıntegratsııa ınstıtýtynyń dırektory Ǵanı Nyǵmetov L.Gýmılev atyndaǵy EUÝ-de ótken tusaýkeserde.
Onyń aıtýynsha, monografııalarda Qazaqstannyń aqparattyq saıasaty týraly keńinen jazylady. Qazirgi ýaqytta Qazaqstandaǵy halyqtyń 30 paıyzy kúndelikti jańalyqtardy ınternetten bilip otyrady.
«Álemdegi ozyq elderdiń kommýnıkatsııalyq saıasatyna saraptama júrgize otyryp, áleýmettik ınstıtýttardyń zertteý nátıjeleri negizge alyndy. Memlekettik organdarǵa degen senim, eýrazııalyq ıntegratsııa turǵysyndaǵy kózqaras, halyq qandaı aqparat kózderine senedi. Osy baǵyttaǵy zertteý jumystarynyń nátıjesi monografııada tolyq qamtylǵan», - deıdi Ǵanı Nyǵmetov.
Tanystyrylymda ujymdyq monografııalardyń birlesken avtorlary men retsenzentteri (N.P. Kalashnıkova, T.Q.Bóribaev, J.K. Medeýov, Ǵ.M. Shalahmetov, Ǵ.T. Telebaev, J.A. Ysqaqova) sóz sóıledi.
Olardyń aıtýynsha, monografııalar QR BǴM qoldaǵan ǵylymı eńbek bolyp tabylady. Atalǵan ǵylymı jınaqtar elimizdegi 50 JOO-nyń áleýmettik-gýmanıtarlyq kafedralary men QHA kafedralary úshin oqý-ádistemelik materıal retinde, sondaı-aq ulttyq kitaphanalar men olardyń fılıaldaryna jiberilmek.