«Rýhanı jańǵyrý» aınalasyndaǵy alýan pikirler ony tek kúsheıtedi – Talǵat Qalıev

NUR-SULTAN. QazAqparat – «Ortalyq kommýnıkatsııalar qyzmeti» respýblıkalyq memlekettik mekemesiniń dırektory Talǵat Qalıev «Rýhanı jańǵyrý» baǵdarlamasyna qatysty pikir bildirdi, dep habarlaıdy QazAqparat tilshisi.

«Búgin biz qyzyqty ári mazmundy dıalogtyń kýási boldyq. Pikirtalas óte nátıjeli boldy. Bul - «Rýhanı janǵyrý» baǵdarlamasynyń shynynda da jumys istep, qoǵamǵa tereń enip, aýqymdy isterdiń atqarylyp jatqanynyń kórsetkishi. Alǵashqy jyldary osy baǵdarlamamen jumys júrgizgenderdiń kóbi jumys retin tolyqqandy bilmegen edi. Endigi kezekte tereń túsinistikpen keıbir ólshemder aıqyndalyp, baǵdarlamany qalaı júzege asyrý týrasynda ártúrli kózqarastar aıtylýda. Dál osy pikirtalastar ony sapasy men mazmuny jaǵynan jetildire túsedi dep oılaımyn», - dedi Talǵat Qalıev Aqordadaǵy jıynnan keıin jýrnalısterge bergen suhbatynda.

Sarapshy «Rýhanı jańǵyrý» baǵdarlamasynyń aınalasyndaǵy alýan pikirlerdi jaǵymdy tendentsııaǵa teńedi.

«Mundaı pikirtalastar ony jetildirýge jáne tıimdiligin arttyrýǵa kómektesedi. Óıtkeni baǵdarlamanyń túpki maqsaty - zamanaýı, progressıvti jáne jastar ortasynda bárine túsinikti, salaýatty moraldyq-qundylyqqa ıe baǵyttardy qalyptastyrý. Búgin de biz jastar arasynda qundylyqtardy túsinbeýshilik baıqalady. Bálkim, bul sýıtsıd pen ajyrasý jaǵdaılarynyń artynda problemalar shyǵar. Sebebi bul psıhologııalyq máselelerdiń artynda qundylyqty burmalaý jaǵdaıy kórinis beredi», - deıdi Talǵat Qalıev.

Eske sala ketsek, búgin Aqordada Qazaqstan Respýblıkasynyń Memlekettik hatshysy Qyrymbek Kósherbaevtyń tóraǵalyǵymen «Rýhanı jańǵyrý» baǵdarlamasy boıynsha ulttyq komıssııa otyrysy ótip, Aqparat jáne qoǵamdyq damý mınıstri Dáýren Abaev baǵdarlamanyń 2020 jylǵa arnalǵan jańa josparyn tanystyrǵan bolatyn.