«Rýhanı jańǵyrý»: 2019 jylǵa arnalǵan is-sharalar jospary bekitildi

ASTANA. QazAqparat - Bıyl «Rýhanı jańǵyrý» baǵdarlama aıasynda ashyq aspan asty jáne geologtar mýzeıi, tarıhı-mádenı saıabaq, qazaq tilindegi jańa oqýlyqtar jáne taǵy basqa birqatar joba júzege asyrylady, dep habarlaıdy QazAqparat QR Qoǵamdyq damý mınıstrligine silteme jasap.

Habarlamada aıtylǵandaı búgin mınıstrliktiń uıytqy bolýymen «Nur Otan» partııasynyń ortalyq apparatynda «Rýhanı jańǵyrý» baǵdarlamasyn iske asyrýdyń jańa tásilderi tanystyryldy.

Sharany QR Qoǵamdyq damý vıtse-mınıstri Juldyz Omarbekova asha otyryp, azamattardyń sanasyn jańǵyrtýda baǵdarlamanyń erekshe mańyzdylyǵyn atap ótti.

«Baǵdarlamany iske asyrýdyń osy kezeńinde barlyq taraptardan belsendi qatysýy, bastama, sondaı-aq keń medıa-taratý talap etiledi. Negizgi mindet - halyqtyń barlyq toptarymen qatar azamattyq jáne úkimettik emes sektordy tartý. Sondaı-aq, baǵdarlamany odan ári iske asyrý maqsatynda ortalyq memlekettik organdardyń jekelegen is-sharalar josparyn qabyldaý oryndy dep sanaımyz», - dedi ol.

Vıtse-mınıstr jańa tujyrymdamalyq tásilderdi esepke ala otyryp, QR Premer-Mınıstriniń ókimimen «Rýhanı jańǵyrý» baǵdarlamasyn iske asyrý jónindegi 2019 jylǵa arnalǵan is-sharalar jospary bekitilgenin habarlady.

«Óńirlerde tarıhı-mádenı saıabaqtar, «ashyq aspan astynda» mýzeıler ashylatyn bolady. Atap aıtqanda, Mańǵystaý oblysynda burǵylaýshy geologtar mýzeıin ashý, «Otyrar», «Tańbaly», «Ulytaý» respýblıkalyq mýzeı-qoryqtarynda 3 sapar-ortalyq salý josparlanýda. Sonymen qatar, 20-dan asa qasıetti nysandarǵa qaıta jóndeý jumystary júrgiziletin bolady. Zııatkerlik sport túrlerimen 5 myńnan asa oqýshy qamtylyp, JOO, kolledjder men kitaphanalar baǵdarlama sheńberinde aýdarylǵan qazaq tilindegi jańa oqýlyqtarmen qamtamasyz etiledi» - dedi vıtse-mınıstr.

Sondaı-aq, shara barysynda QR Mádenıet jáne sport, Bilim jáne ǵylym, Aqparat jáne kommýnıkatsııalar, Aýyl sharýashylyǵy mınıstrligi ókilderiniń baıandamalary tyńdaldy.

Aýyl sharýashylyǵy mınıstrligi «Aýyl - el besigi» arnaıy jobasynyń negizgi baǵyttaryn tanystyrdy. Jobanyń maqsaty - 2030 jylǵa qaraı eldi mekenderde aýyl halqynyń keminde 80% turýyn qamtamasyz etetin, aýyldyq aýmaqtardyń ómir sapasynyń zamanaýı standarttarǵa jaýap beretin áleýmettik-ekonomıkalyq ınfraqurylymdy jańǵyrtý.

Odan bólek, jastardyń aýyldyq eldi mekenderdi damytý men ondaǵy áleýmettik kásipkerlikti damytýǵa keńinen qatysýy, daryndy jastardy agrarlyq ǵylymǵa tartý úshin jaǵdaı jasaý kózdelgen.