Rýhanı kóshbasshylardyń bedeli men úndeýi burynǵydan da mańyzdy – Prezıdent

NUR-SULTAN. QazAqparat – Memleket basshysy Qasym-Jomart Toqaev Álemdik jáne dástúrli dinder lıderleriniń sezinde álem din kóshbasshylarynyń ún qatýy aıryqsha mańyzdy ekenin aıtty, dep habarlaıdy QazAqparat tilshisi.

«Qazaqstan árdaıym kelispeýshilikterdi BUU Jarǵysy rýhynda kelissózder ústelinde retteýge tyrysty. Sanktsııalar men kúsh qoldaný eshqashan máseleni sheshpeıdi. Mundaı sátterde biz gýmanıtarlyq ıdeıalarǵa qaıta oralýymyz kerek. Dástúrli dinder gýmanıtarlyq ıdeıalardy árqashan qorǵaıdy. Adam quqyqtaryn qurmetteý, bir-birin syılaý, ózara kómek, ashyqtyq pen ádilet, teńdik – bul jańa qaýipsizdik júıesiniń tiregi, sondyqtan búginde rýhanı kóshbasshylardyń moraldyq bedeli men úndeýi burynǵydan da mańyzdy», - dedi ol «Álemdik jáne dástúrli dinder lıderleriniń pandemııadan keıingi kezeńdegi adamzattyń rýhanı jáne áleýmettik damýyndaǵy róli» plenarlyq otyrysynda.

Prezıdenttiń aıtýynsha, jahandyq problemalardy syndarly dıalogsyz jáne ózara tıimdi yntymaqsyz sheshý múmkin emes.

«Osyǵan baılanysty qasıetti Rım Papasy Frantsısk pen joǵarǵy ımam Ál-Azhar Sheıh Ahmed at-Taıebtiń álemde ózara qurmet pen qatar ómir súrý úshin úndeýiniń mańyzdylyǵyn atap ótkim keledi. Jahandyq problemalardy syndarly dıalogsyz jáne ózara tıimdi yntymaqtastyqsyz sheshý múmkin emes», - dedi Memleket basshysy.

Buǵan deıin Qasym-Jomart Toqaev koronavırýstan keıin týyndaǵan jahandyq máselelerdi ataǵan edi.