Rýdnyıdaǵy jalǵyz travmatologııa pýnkti jabylýy múmkin

QOSTANAI. QazAqparat – Rýdnyı qalalyq aýrýhanasy kredıtorlyq bereshekti arttyryp, travmatologııalyq pýnkt qyzmetin ustap jatqanyna altynshy aı boldy. Buǵan QR Densaýlyq saqtaý mınıstrliginiń qańtar aıynan bastap halyq sany 150 myńnan az eldi mekender jaraqat pýnktiniń qyzmetin júrgize almaıtyny jóninde standarty sebep boldy. Beıindi vedomstvonyń qaǵazǵa jazylǵan, biraq is júzinde pysyqtalmaǵan standarty kenshiler qalasyn travmatologııa pýnktinen aıyrýy múmkin. Bul jaıynda qalalyq aýrýhananyń bas dárigeri Talǵat Qaıkenov aıtyp berdi, dep habarlaıdy QazAqparat tilshisi.

Densaýlyq saqtaý mınıstrliginiń oılastyrylmaǵan normatıvteri búginde halyqtyń narazylyǵyn týdyrdy.

Ázirge Rýdnyıdaǵy travmatologııalyq pýnkt jumys istep tur, biraq ol kez kelgen ýaqytta jabylýy múmkin.

Sebebi, ony aýrýhananyń óz qarajaty esebinen ustap, kredıtorlyq bereshekti ulǵaıtý tıimdi emes, dep atap ótti Qaıkenov.

«2022 jyldyń shildesinde Densaýlyq saqtaý mınıstrligi halyq sany 150 myń adamnan az eldi mekenderde travmatologııalyq kómek kórsetý standarty boıynsha travmpýnkter jumys istemeıtini týraly buıryq shyǵardy. 1 qańtardan bastap bizde qarjylandyrý, qabyldaý bólmesi arqyly balama qarjylandyrý da joq. 6 aıǵa jýyq ýaqyt travmatologııa pýnktin óz qarajatymyzǵa ustap otyrmyz. Men ony jaba almaımyn. Onsyz qalaı? Travmatologııa pýnkt ustaýǵa orta eseppen 67-68 mln teńge jumsalady, munda 16 adam jumys isteıdi. Biraq onyń jabylǵanyn tipti elestete almaımyn. Sebebi jylyna 13 myń adamdy qabyldaımyz, kúnine 50-60 adam. Bul adamdarǵa kim kómektesedi? Sonda olar kómek alý úshin Qostanaıǵa barýy kerek pe?»,- deıdi aýrýhananyń bas dárigeri.

Osy arada máseleni sheshýge qala ákimi tartyldy, oblys ákimi, Qostanaı oblysynyń senatorlary men májilismenderi de bul jaǵdaıdan beıhabar emes.

Tipti densaýlyq saqtaý vıtse-mınıstri V.Dýdnık bql jerge travmatologııalyq kómek kórsetý standarttaryn ázirleýshilerdi jiberdi.

Biraq 6 aı ishinde máseleni eshkim alǵa tartyp, sheshken joq.

«Biz qalanyń aınalasynda tirkelgen halyq kóp ekenin dáleldeımiz. Bizde standarttaǵy 150 myń adam bolý úshin 10 myńǵa jýyq adam jetpeıdi. 140 myń halyq bar, odan kóp jınaı almaımyz. Bizde jaraqat alý qaýpi bar iri kásiporyndar bar ekenin túsindiremiz. Qazir qalada 9 kópqabatty úı salynyp jatyr, qurylysta kóp adam jumys isteıdi. Sonymen qatar bizde Qostanaı - Aqtóbe tasjoly bar. Qıyn jaǵdaı oryn alsa, adamdar qaıda barady? Osy suraqtardyń bárin ár ýaqytta kóterip, dáleldep júrmiz. Al sheshim joq», - dep atap ótti T. Qaıkenov.

Aıta keteıik, travmatologııalyq kómek kórsetý standartyn ázirleýshiler Rýdnyıda tirkelgen halyq sany men jaraqat alý qaýpi bar kásiporyndar kóptigin eskere otyryp, qalaǵa travmpýnkt qajet ekendigimen kelisken.

Alaıda ony ustaýǵa qarjy áli kúnge deıin bólingen joq.