Rýdnyıdaǵy egizder ólimi: Máskeýden saraptama qorytyndysy kelýi kerek

QOSTANAI. QazAqparat – Rýdnyıda aýrýhanadan shyqqan kúnniń keshinde qaıtys bolǵan egizderdiń ólimine qatysty istiń núktesi áli qoıylǵan joq. Balalardyń qaıtys bolý sebebi Máskeýden kelýi tıis saraptamanyń qorytyndysy boıynsha aıqyndalmaq, dep habarlaıdy QazAqparat tilshisi Qostanaı oblysy prokýrorynyń orynbasary Baýyrjan Bekbosynovqa silteme jasap.

Aıtýynsha, prokýratýra QR Qylmystyq protsessýaldyq kodeksiniń 201-babynyń talaptaryna sáıkes qylmystyq istiń egjeı-tegjeıin jarııa ete almaıdy. Degenmen, prokýror keıbir málimetterdi aıtty.

Saraptamalyq jolmen, qolda bar derekterdi zertteý arqyly eki balanyń óliminiń sebebin elimizde anyqtaı almaǵanymyzdy rastaımyn. Sondyqtan, Bas prokýratýramen ózara is-qımyl arqyly halyqaralyq kelisimder sheńberinde saraptama Máskeýde ótkiziletin boldy. Tergeýshi Reseı Federatsııasyna issaparǵa jiberildi, Reseı sarapshylarymen keri baılanys ornatyldy. Biraq, saraptamanyń kúrdeliligin eskere otyryp, onyń qorytyndysy shyqqanyn kútip otyrmyz. Іs bizdiń de, Bas prokýratýranyń da baqylaýynda

, - dedi oblys prokýrorynyń orynbasary tilshilerge arnalǵan brıfıngte sóılegen sózinde.

Tilshiler qaıtys bolǵan uldardyń anasyna jáne oǵan tergeý organdarynyń yqtımal qysymyna qatysty suraq qoıdy. Belgili bolǵandaı, qazir is boıynsha egizderdiń anasy – qorǵaýǵa quqyǵy bar kýáger, al qaıtys bolǵan balalar – jábirlenýshi. Baýyrjan Bekbosynovtyń aıtýynsha, analarynyń mártebesi júrgizilgen tergeý áreketterine baılanysty ózgertilgen.

Ol qazir kúdikti nemese aıyptalýshy emes, ol – qorǵaýǵa quqyǵy bar kýáger. Іs boıynsha qalyptasqan mán-jaılar onyń qaıtys bolǵan balalardyń anasy bolǵanyna qaramastan, is boıynsha jábirlenýshi retinde qabyldanýyna múmkindik bermeıdi. Al, dárigerlik qatelik nusqasyna kelsek, QR QPK-niń 179-babyna engizilgen talaptar bar. Oǵan sáıkes, eger ýákiletti organnyń tıisti aktisi bolmasa, biz medıtsınalyq qylmystar boıynsha qylmystyq is qozǵaı almaımyz. 317-bap boıynsha («Medıtsınalyq nemese farmatsevtıkalyq qyzmetkerdiń kásibı mindetterin tıisinshe oryndamaýy» - avt.) is tirkeldi, tergeý bastaldy. Biraq, medıtsınalyq mekemeler qyzmetkerleriniń áreketterine/áreketsizdigine baǵa berý úshin biz balalardyń óliminiń sebebi týraly qorytyndy aktini kútýimiz kerek. Sonda ǵana dárigerlerdiń kinási bar ne joǵyn aıta alamyz

, - dep atap ótti oblys prokýrorynyń orynbasary.

Rýdnyılyq alty jasar egizder ótken jyldyń qazan aıynda qaıtys boldy. Balalar Rýdnyı aýrýhanasyna jedel járdemmen 12 qazanda túsedi. Aıaqtaǵy álsizdik, dirildeý, uıqyshyldyq, emotsıonaldy turaqsyzdyqqa shaǵymdanǵan. Olar aýrýhanaǵa jatqyzyldy. Infýzııalyq terapııa júrgizildi. Keıin olardyń jaǵdaıy jaqsy dep baǵalanyp, anasynyń talaby boıynsha shyǵaryldy. Búldirshinder sol kúni keshke qaraı qaıtys boldy.

Keıinirek bul fakt boıynsha polıtsııa túsinik berdi. Balalar ólimi boıynsha toksıkologııalyq saraptama taǵaıyndaldy. Saraptama olardyń ýlanǵanyn rastady.