Rýdnyıda jelilerden taǵy aqaý shyǵyp, 100 nysan jylýsyz qaldy

QOSTANAI. QazAqparat – Qostanaı oblysynyń Rýdnyı qalasynda jylý magıstralinen taǵy aqaý shyǵyp, 83 úı men 17 nysan jylýsyz qaldy. Bul týraly Qostanaı oblysy ákimdiginiń baspasóz qyzmetinen málim etti, dep habarlaıdy QazAqparat tilshisi.

«9 aqpan kúni saǵat 08:30-da Rýdnyı qalasynda jylý magıstralinde aqaý anyqtaldy. Osyǵan baılanysty Gornıakov kóshesiniń Dzerjınskııden Lenınge deıingi bóliginde ornalasqan jylý trassasy jabyldy. 24 kópqabatty úı, 59 jeke úı men 17 zańdy tulǵanyń ǵımaratyna jylý berý ýaqytsha toqtatyldy», - dep málim etti oblys ákimdiginiń baspasóz qyzmetinen.

Eske salaıyq, sońǵy kezderi jylý jelisindegi jıilegen aqaýlarǵa baılanysty taıaýda Prezıdent atalǵan qalaǵa jumys saparymen bardy. Jaǵdaımen tanysqan Qasym-Jomart Toqaev Rýdnyıdaǵy jelilerdiń tozý deńgeıi óte joǵary ekenin atap ótip, oblys pen shahar ákimdigine jaǵdaıdy jedel qalpyna keltirý týraly tapsyrma berdi.

Sonymen birge 6 aqpanda jelilerdegi apattar men irkilistiń jıi oryn alýyna baılanysty Rýdnyı qalasynda tótenshe jaǵdaı rejımi engizildi.