Rýdnyıda tehnogendi sıpattaǵy tótenshe jaǵdaı jarııalandy

QOSTANAI.QazAqparat - Rýdnyı qalasynyń tirshilikti qamtamasyz etý júıeleri shtattyq rejımde jumys istep jatqanyna qaramastan, qalada tótenshe jaǵdaı rejımi jarııalandy. Oǵan sebep - jelilerdegi apattar men irkilistiń jıi oryn alýy, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

«Jaǵdaı turaqty. Alaıda jylý jáne sýmen jabdyqtaý, káriz jelileriniń keıbir ýchaskelerinde tozýdyń joǵary deńgeıine baılanysty apattar men jarylý jaǵdaılary jıilep ketkendikten, qala ákimdigi sýdyń qatyp qalýynyń aldyn alý maqsatynda jylý berý maýsymyndaǵy jelilerdi, sondaı-aq tótenshe jaǵdaılardy joıý, qosymsha kúshter men qarjylyq qoldaýdy tartý arqyly jergilikti mańyzy bar tehnogendi sıpattaǵy tótenshe jaǵdaı jarııalady», - dep habarlady ákimdik.
27 qańtarda Rýdnyıda jylý magıstraliniń jarylýy saldarynan 24 kópqabatty úı men 59 jeke úı jylýsyz qalǵan bolatyn. Bir apta buryn dál sol jelide apat bolǵan edi. Ol kezde birneshe ondaǵan úı, sondaı-aq júzden astam jeke úı men ǵımarattar jylýsyz qaldy. Memleket basshysy Qasym-Jomart Toqaev oqıǵa ornynda bolyp, apattyń saldarymen tanysyp, jaǵdaıdy qalypqa keltirý boıynsha tıisti tapsyrmalar berdi.