Rýdnyıda polıtseı kóshede talyp qalǵan er adamdy qutqardy

QOSTANAI. QazAqparat – Rýdnyıda polıtsııanyń kishi serjanty denesi dirildep qulap qalǵan er adamǵa kómekke keldi, dep habarlaıdy QazAqparat oblystyń polıtsııa departamentiniń baspasóz qyzmetine silteme jasap.

Polıtsııa qyzmetkeri Aslan Muqanov jumysynan úıine qaıtyp kele jatyp, er adamnyń kenet jerge qulap túskenin kórgen. Onyń denesi úzdiksiz qaltyraı bastaǵan.

Polıtseı birden alǵashqy medıtsınalyq kómek kórsetip, jedel járdem shaqyrady.

Oqıǵa ornyna kelgen dárigerler er adamnyń tiri qalýyna der kezinde kómektesken polıtsııa qyzmetkeriniń is-áreketi áser etkenin atap ótti.

«Alǵashqy kómekti birinshi ret kórsetip turǵan joqpyn. Másele mynada, meniń aǵam da epılepsııamen aýyrady jáne adamdardyń densaýlyǵynda osyndaı máseleler týyndaǵan kezde ne isteý kerektigin bilemin. Bul jaǵdaıda birinshi kezekte adamdy qyryna jatqyzynyp, demin qalpyna keltirý kerek», - dep atap ótti polıtsııa qyzmetkeri.

Polıtsııanyń kishi serjanty ishki ister organdarynda eki jyldan beri qyzmet atqarady.

2021 jyldyń mamyr aıynda ol ýaqytsha ustaý ızolıatorynyń kúzetshisi laýazymyna taǵaıyndalǵan.

Qazirgi ýaqytta er adamnyń jaǵdaıy birqalypty, ol úıinde. Rýdnyı azamaty polıtsııa qyzmetkerine jedel áreketi úshin alǵysyn jetkizdi.