Rýdnyıda órt sóndirýshiler úsh adamdy janyp jatqan úıden alyp shyqty

QOSTANAI. QazAqparat – Rýdnyı qalasynyń órt sóndirýshilerdi birneshe adamnyń ómirin aman saqtap qaldy, dep habarlaıdy QazAqparat Qostanaı oblysynyń tótenshe jaǵdaılar departamentiniń baspasóz qyzmetine silteme jasap.

14 qarasha saǵat 02:22 kezinde Rýdnyı qalasy kezekshi bólimine bes qabatty turǵyn úıdegi órt týraly qońyraý túsken. Qostanaı oblysy TJD Órt sóndirý qyzmetiniń 13 qyzmetkeri men 3 tehnıkasy Korchagın kóshesindegi oqıǵa ornyna kidirissiz shyqty. Órt oqıǵasy turǵyndardyń temeki shegýinen soń bolǵan.

Besinshi qabattaǵy páterde turǵyndar kóńildi otyrys jasaǵan. As úıde úsh adam ishimdik iship, temeki shekken. Biraz ýaqyttan keıin olar basqa bólmede otyryp, kúıik pen tútinniń ıisin sezdi. Olar «101» qyzmetin shaqyryp úlgirgen.

«Ysqa ýlanǵan turǵyndardyń otpen kúresýge shamasy kelmedi. Órt sóndirýshiler as úıdegi edende tóselgen kilemniń janyp jatqanyn kórdi. Jalyn tereze jaqtaýyn sharpyǵan. As úıdiń qabyrǵalary men tóbe jabyny otqa orandy. Qutqarýshylar órtti 15 mınýt ishinde sóndirdi. Olar páter ishindegi úsh adamdy baspaldaq arqyly evakýatsııalady. Jedel jáne saýatty is-áreketterdiń arqasynda órt sóndirýshiler qaıǵyly jaǵdaıdyń aldyn aldy» delingen TJD habarlamasynda.

Qostanaı oblysynyń TJD temeki shegý men otty abaısyz qoldaný qaıǵyly jaǵdaıǵa ushyratýy múmkin ekenin eskertedi.