Rýdnyıda mas erkek fýtbol oınap júrgen balalardy soqqyǵa jyqty: bir bala aýrýhanada jatyr

RÝDNYI. QazAqparat – Rýdnyıda mas er adam sport alańynda oınap júrgen balalarǵa tıisken, dep habarlaıdy QazAqparat jergilikti Nasha Gazeta basylymyna silteme jasap.

Oqıǵa keshe Lenın kóshesi, 177-úı mekenjaıy mańynda boldy.

12-13 jas shamasyndaǵy jasóspirimder fýtbol oınap júrgen sport alańyna mas er adam kirip, dop tebe bastaǵan.

- Olar ketkisi kelgen, biraq er adam balalardyń birin qýyp jetip, basynan tizemen teýip, judyryqpen urǵan. Mıy shaıqalǵan bala aýrýhanaǵa jatqyzyldy, qazir dárigerlerdiń baqylaýynda, - dep habarlady jasóspirimderdiń ata-anasy.

Qostanaı oblystyq polıtsııa departamentiniń baspasóz qyzmeti oqıǵanyń mán-jaıy anyqtalyp jatqanyn málim etti.