Rýdnyıda lańkestik áreket týraly jalǵan aqparat taratqan er adam ustaldy

QOSTANAI. QazAqparat – Rýdnyı qalasyndaǵy mektepterdiń birinde lańkestik áreket jasalatyny týraly jalǵan aqparat taratqan er adam ustaldy, dep habarlaıdy QazAqparat Qostanaı oblysy polıtsııa departamentiniń baspasóz qyzmetine silteme jasap.

Vedomstvonyń habarlaýynsha, 2 mamyr túngi ýaqytta Rýdnyı qalasy polıtsııa basqarmasynyń 102 nómirine qaladaǵy № 3 mekteptiń mańynda lańkestik áreket jasalatyny týraly habarlama kelip túsken.

«Oqıǵa ornyna polıtsııa, órt sóndirý qyzmetkerleri, jedel járdem brıgadasynyń dárigerleri kelip jetti. Oqıǵa ornyndaǵy aýdan qorshalyp, kólik jáne adam qozǵalysyna shekteý qoıyldy. Kınolog mamandar men jarylys tehnıkteri mektep ǵımaraty men onyń mańyndaǵy aýmaqty tekserip shyqty. Tekserý qorytyndysy boıynsha, ol jerden jarylǵysh quraldar anyqtalǵan joq», - dep túsindirip ótti polıtsııada.

Polıtsııanyń baspasóz qyzmetinde qylmysty ashý jáne jalǵan lańkesti anyqtaý úshin polıtsııanyń kóp quramy jumsalǵanyn atap ótti.

«Jedel-izdeý sharalaryn ótkizý barysynda polıtseıler buryn sottalǵan 32 jastaǵy jergilikti turǵyndy anyqtady. Mas kúıinde bolǵan er adam óz áreketiniń sebebin túsindire almady. Qazirgi kezde kúdikti ýaqytsha oqshaýlaý abaqtysyna qamaldy», - dep túsindirip ótti vedomstvoda.

Lańkestik aktisi týraly kórineý jalǵan habarlama taratý babymen tirkelgen atalǵan fakti boıynsha sot aldyndaǵy tergeý amaldary júrgizilip jatyr.

Aıta keteıik, atalǵan bap boıynsha qylmys jasaǵany úshin 5 jylǵa bas bostandyǵynan aıyrý jazasy qarastyrylǵan.