Rýdnyıda adamdardy eki táýlikke úılerinen bezdirgen «lańkes» jazalandy

ASTANA. QazAqparat - 2016 jyldyń 4 qyrkúıegi kúni Qostanaı oblysynyń Rýdnyı qalasyndaǵy kópqabatty turǵyn úıden adamdar qaýipsiz jerge kóshirilgen bolatyn.

Sebebi Lenın kóshesinde ornalasqan toǵyz qabatty bul úıden «jarylǵysh zat» izdestirildi, dep habarlaıdy QazAqparat «Alaý» aqparattyq portalyna silteme jasap.

Aıyptalýshy lıfttiń qabyrǵasyna markermen: «5 qyrkúıek kúni barlyqtaryńyz ólesizder», «úılerińizde bomba jarylady», dep jazǵan edi. Arnaıy qyzmet mamandary «jarylǵysh zatty» izdegenshe adamdar eki táýlik boıy úılerine kire almady.

Keıin lańkestik aktisi týraly kórineý jalǵan aqparat taratqan kúdikti - Erlan Aqmyrzaev ustaldy. Sotqa deıingi óndiris kezinde prokýror men aıyptalýshy arasynda qorǵaýshylardyń qatysýymen protsessýaldyq kelisim jasaldy.

20 qazan kúni Aqmyrzaevqa qatysty úkim shyqty. Oblystyq sottyń baspasóz qyzmetinen málim etkendeı, ol jazasyn jalpy rejimdegi abaqtyda óteýmen 2 jylǵa bas bostandyǵynan aıyryldy. Onymen qosa, habarlamany tekserýge shyqqan arnaıy qyzmetterge úsh mıllıon teńge kólemindegi materıaldyq shyǵyndy óteýi tıis.