Rýdnyı turǵyny vaktsına saldyryp, kólik utyp aldy

QOSTANAI. QazAqparat – Qostanaı oblysynda 1 tamyz ben 30 qyrkúıek aralyǵynda vaktsınanyń birinshi komponentin alǵan turǵyndar arasynda avtomobıl utys oıyny ótkizildi, dep habarlaıdy QazAqparat.

Oıynǵa aımaqta vaktsına alǵan 73 myńnan astam adam qatysty. Jeńimpazdy arnaıy baǵdarlama arqyly tańdaǵan.

Oıyn qorytyndysy boıynsha, Rýdnyı qalasynyń 69 jastaǵy turǵyny Natalıa Fedorovna Blým jeńimpaz atanǵan.

Utys oıynyn uıymdastyrýshylar oǵan tikeleı efır arqyly habarlasty. Natalıa Fedorovna óz baǵyna sene qoıǵan joq.

«Bul qyzyq jaǵdaı boldy. Iá, men 1 tamyz ben 30 qyrkúıek aralyǵynda vaktsına saldyrttym. Biraq sene alar emespin!», - dedi jeńimpaz telefon arqyly.

Oblystyq densaýlyq saqtaý basqarmasynan baıandaǵandaı, tamyz aıynyń basynda Qostanaı oblysy turǵyndarynyń arasynda «Chevrolet Nexia» kóligin oınatý týraly jarııalanǵan.

Vedomstvonyń málimetinshe, 1 aqpannan bastap birinshi oblysta vaktsınanyń komponentin saldyrtqandar sany 320 myń adam bolsa, ekinshi komponent 293 myń adamǵa egildi, jalpy qamtý 58 paıyzdy quraǵan.

Aımaqta vaktsına egilýi tıis 505 myń adam bar. Oblysta 190 ekpe salý pýnkti jumys isteýde.

Buǵan deıin vaktsına alǵan oblys turǵyndarynyń arasynda 10 aıfon oınatylǵan.