Rýdnyı qalasynda jeke úıde bolǵan órt saldarynan er adam qaza tapty

QOSTANAI. QazAqparat – Turǵyn úıde bolǵan órttiń saldarynan 47 jastaǵy er adam qatty kúıik shalyp, aýrýhanada qaıtys boldy. Bul týraly Qostanaı oblysy TJD baspasóz qyzmeti málim etti, dep habarlaıdy QazAqparat.

Vedomstvo aqparatynsha, 15 mamyr kúni tańǵy saǵat 08:30-da Shevchenko kóshesi boıynda órt shyqqan.

«Rýdnyı qalasynyń №2 órt sóndirý bólimi kezekshisiniń pýltine janyp jatqan úı týraly qońyraý tústi. Órt sóndirý qyzmeti oqıǵa ornyna kelgen kezde turǵyn úı alaýlap janyp jatqan. Órt sóndirýshiler jalyndy 15 mınýttan keıin aýyzdyqtady. Órt tolyǵymen saǵat 08:55-te sóndirildi. Úı ishindegi 10 sharshy metr aýmaqtaǵy bólme otqa oranǵan. Bólme jıhazdar jáne zattarmen birge janyp jatqan. Órt bolǵan jerde úıdiń kireberisinde kúıik shalǵan 47 jastaǵy er adamnyń denesi tabylǵan, ol kezde er adam tiri bolǵan», - dep habarlady TJD.

Qutqarýshylar zardap shekken er adamdy dárigerlerge tapsyrǵan. Ol aýrýhanada qaıtys boldy.

«Jergilikti turǵyndardyń aıtýynsha, er adamnyń turaqty úıi bolmaǵan, onyń órt shyqqan úıge qatysy bolmaǵan. Órttiń sebebi anyqtalýda», - dep qorytty TJD.