Rýdnyıda Beıimbet Maılınniń qurmetine mýral paıda boldy

<p>ASTANA.KAZINFORM - Belgili jazýshynyń portreti Rýdnyıdaǵy turǵyn úılerdiń birine sán berip tur. Qabyrǵa sýreti 15 qarashada mereıtoıy atalyp ótetin qazaq sovet ádebıetiniń negizin qalaýshy Beıimbet Maılınniń 130 jyldyǵyna arnalǵan.</p>

Bastamashy ótken jyly turǵyn úıdi qaıta qalpyna keltirgen merdiger qurylys kompanııasy boldy. Mýral almatylyq ónerpazdar Qabóke Oralbek pen Aıat Órkenniń qolynan shyqty.

Jumys týra bir aptada aıaqtaldy. Kompanııanyń PR bólimi basshylyǵynyń uly jazýshynyń esimin máńgilikke qaldyrýdy uıǵaryp, aqyn-dramatýrg Beıimbet Maılınniń 130 jyldyǵyn nazardan tys qaldyra almaǵanyn aıtty.

Qabyrǵada dramatýrgtiń portreti, qanatty sózi men ulttyq oıý-órnek beınelengen. Portrettiń ashylýynda B.Maılınniń urpaqtary, atap aıtqanda astanada turatyn shóberesi Botagóz Ábiqanova kelip, babasynyń qurmetine uıymdastyrylǵan sharaǵa rızashylyqtaryn bildirdi.

Portretti Rýdnyı qalasy, Lenın 215 mekenjaıynan kórýge bolady.

Buǵan deıin Qostanaıdaǵy jataqhana qabyrǵasynda Ahmet Baıtursynovqa arnalǵan mýral paıda bolǵanyn habarlaǵan edik.