Rýdnyıda asa iri kólemde urlyq jasaǵan saýyqtyrý kesheni basshysynyń hatshysyna úkim shyqty

<p>RÝDNYI. KAZINFORM &ndash; Rýdnyı qalalyq sotynda alaıaqtyq, sondaı-aq senimge qııanat jasaý arqyly bótenniń múlkin urlaý boıynsha aıyptalýshyǵa qatysty qylmystyq is (QK-niń 190-baby 4-bóliginiń 2-t.) qaraldy. Bul týraly Joǵarǵy sottyń baspasóz qyzmeti habarlady.&nbsp;</p>

Rýdnyı qalalyq Bilim bóliminiń balalardy tárbıeleý-saýyqtyrý kesheni basshysynyń hatshysy qyzmet babyn paıdalanyp, ádeıi 2022-2023 j.j. áleýetti klıentterge WhatsApp messendjerinde jalǵasyp jatqan aktsııalar týraly habarlamalar jibergen. Ol sol arqyly balalar lagerlerine 50% jeńildikpen joldamany brondaýǵa bolatyny týraly aıtqan. Sondaı-aq óziniń jeke bank shottaryna joldama úshin aqy tóleý qajettigin eskertken.

Osylaısha, ol buryn joldama satyp alǵan adamdarǵa jalǵasyp jatqan aktsııalar týraly habarlamalar jibergen. Soǵan sáıkes 2023 jyldyń jazǵy maýsymyna lagerlerge joldamalardy 2022 jylǵa arnalǵan joldama qunymen jáne 50% jeńildikpen erte brondaý múmkin ekenin, bolashaqta bos oryndardyń bolmaı qalatynyn jáne joldama quny ósip ketetinin atap kórsetken.

Odan ári, osy lagerlerge joldamalarǵa qol jetkizip, olardyń kóshirmelerin jasap, ózi arqyly satylǵan joldamalardyń sany týraly basshylyǵyn jańylystyrý arqyly ol alǵan aqshasyna olardy satyp alýshylarǵa aýdarǵan. Sonymen birge ol lagerlerdiń shekten tys balalardy qabyldaýǵa múmkindigi joq ekenin anyq bilgen jáne joǵaryda kórsetilgen tártippen barlyǵyna joldama satýdy jalǵastyryp, tólemdi óz esepshotyna alyp otyrǵan.

Keshen hatshysynyń qylmystyq áreketinen memleketke 18,4 mıllıon teńge (asa iri kólemde) zalal kelgen.

Prokýror sottalýshyny 5 jylǵa shartty túrde bas bostandyǵynan aıyrýdy talap etti. Sottalýshy óz kinásin tolyq moıyndap, shartty túrde bas bostandyǵynan aıyrýdy surady. Jasaǵan isine shyn júrekten ókiný, jas balasynyń bolýy jáne keltirilgen zııandy jartylaı óteý jaýapkershilikti jeńildetetin mán-jaılar dep tanyldy. 

Aýyrlatatyn faktorlar anyqtalmaǵan.

Sottalýshy taǵylǵan aıyp boıynsha kináli dep tanyldy jáne jas balasynyń bolýyna baılanysty oǵan 5 jylǵa bas bostandyǵynan shartty túrde aıyrý jazasy taǵaıyndaldy. Mekemeniń azamattyq talap qoıýy qanaǵattandyryldy: materıaldyq shyǵyndy óteý úshin sottalǵannan 16 mln teńge óndirildi.

Úkim zańdy kúshine engen joq.