Rýdnyı qalasynda kezekte turǵan 21 otbasy úıli boldy
«Qurmetti, Rýdnyı qalasynyń turǵyndary, búgin barlyǵymyz úshin qýanyshty kún, óıtkeni sizder páter ıesi atanyp jatsyzdar. Adam ómirindegi basty armandardyń biri baspanaly bolý emes pe?! Sizderdi shyn júrekten quttyqtaımyn. Oblys aýmaǵynda, sondaı-aq Rýdnyı qalasynda halyqty turǵyn úımen qamtamasyz etý máseleleri júıeli túrde sheshilip keledi. Rýdnyı qalasynyń tartymdylyǵyn, jaılylyǵyn arttyra túsetin jumystar josparda. Qazirdiń ózinde qalada kóptegen ózgeris bar», - dedi oblys ákimi Qumar Aqsaqalov saltanatty jıynda.
«Sabyr» dep atalatyn jańa keshenniń páterleri ártúrli. Bir bólmeli 38 sharshy metr bolsa, eki bólmelisi – 56 sharshy metrden 80 sharshy metrge deıin, al úsh bólmeliniń kólemi – 84 sharshy metr. Páter kiltteri áleýmettik sanattar boıynsha memlekettik turǵyn úı qorynyń kezeginde turǵan azamattarǵa berildi. Olardyń qatarynda halyqtyń osal top ókilderi, kópbalaly otbasylar jáne balalar úıiniń túlekteri bar.
«Biz kezekte 2021 jyldyń qańtar aıynan bastap turdyq. Men kópbalaly anamyn, 4 balam bar. Ózimizdiń úıimiz eshqashan bolmaǵan, osy kúnge deıin jaldamaly páterde turdyq. Búgin qýanyshymda shek joq, shynymdy aıtsam, 3 bólmeli páter alǵanymyzǵa áli sene almaı turmyn. Bizge osyndaı qoldaý kórsetip jatqan memleketke alǵysym sheksiz. Bul úı de, páterdiń ózi de óte unady. Balalar óte rıza, qazirdiń ózinde bir kirgennen júgirip, keń páterde oınap júr. Endi jaqyn arada tezirek kóship kelsek dep otyrmyz», - dedi kópbalaly ana Aıjarqyn Sarıeva.
Qalada qazir komfort sanatyndaǵy «Aıat» turǵyn úı kesheni salynyp jatyr. Bul ortalyqta ornalasqan 6 qabatty 120 páterlik keshen bolmaq. Qurylysy júrip jatqan taǵy bir nysan – zaman talabyna saı qonaqúı. «Abyroy apart hotel» qaladaǵy páter men qonaqúı máselesiniń eń ońtaıly sheshimi ári qalanyń ınfraqurylymy men sáýletiniń erekshe nysany bolmaq. Bas merdiger – keıingi jyldary Rýdnyıdaǵy eski úılerdi jańǵyrtýmen jáne qala kelbetin ásemdeıtin, jańa turǵyn úı keshenderin salýmen aınalysyp júrgen QC Holding.
«Biz bir jyldyń ishinde Rýdnyı qalasynda tórt úıdi paıdalanýǵa berdik. Jergilikti atqarýshy organdarmen aldaǵy ýaqytta da tabysty, sapaly jáne júıeli jumys atqarýǵa daıynbyz», - deıdi kompanııa basshysy Nuralhan Kýlchıkov.