Rýda tıelgen vagondar qulaǵan Ertis ózeninde balyq qyrylǵan joq

ÓSKEMEN. QazAqparat – Shyǵys Qazaqstan oblysynda rýda men shlak tıelgen vagondar qulaǵan ózende balyq qyrylý faktisi tirkelmedi, dep habarlaıdy QazAqparat tilshisi.

Sáýirdiń 3-i kúni Óskemen-Kúmistaý temirjol ýchaskesinde júk poıyzynyń 18 vagony relsten shyǵyp ketken bolatyn. Onyń altaýy Ertis ózenine qulady.

Bes vagonda shlak, bireýinde rýda tıelgen edi.

Sol jerge Balyq sharýashylyǵy komıtetiniń Zaısan-Ertis oblysaralyq basseındik balyq sharýashylyǵy ınspektsııasynyń qyzmetkerleri men «Balyq sharýashylyǵy ǵylymı-óndiristik ortalyǵy» JShS mamandary baryp, tekserý júrgizdi.

«Tekserý barysynda balyq qyrylý faktisi anyqtalǵan joq. Sondaı-aq sý qoımasynda erigen ottegi mólsherin ólsheý jumystary júrgizildi. Nátıjesinde, onyń balyq sharýashylyǵy normatıvterinen aspaǵandyǵy belgili boldy», - delingen ınspektsııa ókilderi taratqan málimette.

Esterińizge sala ketsek, osyǵan deıin Shyǵys Qazaqstanda júk tıelgen 18 vagonnyń relsten shyǵyp ketkeni habarlanǵan bolatyn.