Rýbl/teńge jubynyń baǵamyna áser etý maqsatyndaǵy kez kelgen aıla-sharǵyǵa jol berilmeıdi

NUR-SULTAN. QazAqparat – QR Ulttyq bank tóraǵasy Ǵalymjan Pirmatov Májilis depýtattarynyń rýbldiń teńge boıynsha arnaıy eseptik baǵamyn qalyptastyrýǵa qatysty usynysyna jaýap berdi, dep habarlaıdy QazAqparat tilshisi.

«Teńgeniń rýblge qarsy naryqtyq emes arnaıy aıyrbastaý baǵamyn targetteý, qalǵan valıýtalarǵa qarsy baǵamdy erkin qalyptastyrý kezinde naryqqa qatysýshylarǵa táýekelsiz paıda úshin tórelik múmkindikter jasaıdy. Basqasha aıtqanda, naryqqa qatysýshylar Qazaqstanda basqa elderdegi «qymbat» rýblge qaraǵanda salystyrmaly túrde «arzan» rýbl satyp alatyn bolady. Bul jaǵdaıda ulttyq valıýta baǵamyna alypsatarlyq shabýyldar Ulttyq banktiń altyn valıýta rezervteriniń sarqylýyna alyp keledi jáne ekonomıkada teńgerimsizdikterdi týdyrady», - dedi Ulttyq bank tóraǵasy jaýabynda.

Sol sebepti, onyń atap ótýinshe, rýbl/teńge jubynyń baǵamyna áser etý maqsatyndaǵy kez kelgen aıla-sharǵyǵa jol berilmeıdi.

«Ulttyq bank aıyrbastaý baǵamynyń erkin ózgerý qaǵıdattaryn ustanady. Baǵam oryn alǵan naryqtyq jaǵdaılarǵa baılanysty da qalyptasatyn bolady», - dedi Ǵalymjan Pirmatov.