Roza Muqanova: Dramatýrgııanyń ereksheligi - jan men sananyń arpalysyn kórsete bilýinde

NUR-SULTAN. QazAqparat - Bul týraly «Aýyl» halyqtyq-demokratııalyq patrıottyq partııasynyń uıymdastyrǵan «Aýylym — altyn tuǵyrym» dástúrli ádebı-onlaın konkýrsynyń jeńimpazdaryn marapattaý saltanatynda aıtyldy, dep habarlaıdy QazAqparat tilshisi.

«Proza» atalymy boıynsha birinshi oryn Retbek Maǵazǵa, ekinshi oryn Jadyra Shamuratovaǵa, úshinshi oryn Abaı Aımaǵanbetovke buıyrdy.

Bul atalymda Ábish Kekilbaev atyndaǵy arnaıy júldemen - Álıhan Jaqsylyq, Aqan Nurmanov atyndaǵy arnaıy júldemen - Abaı Oraz, Raqymjan Otarbaev atyndaǵy arnaıy júldemen - Asylan Qýanyshuly, «Aýyl» partııasynyń arnaıy júldesimen - Rústam Gasymov marapattaldy.

«Qalyptasqan sýretker bolmasa, dramatýrgııaǵa aıaq basý qıyn. Bıyl osy janrda toǵyz shyǵarma qatysty. Dramatýrg bolý úshin adamnyń janyn tereń túsiný kerek. Qalyptasyp qalǵan dástúrge jannyń kelispeýi «dramatýrgııadaǵy konflıkt» dep atalady. Janrdyń ereksheligi - jan men sananyń arpalysynda», - deıdi jazýshy-dramatýrg, qazylar múshesi Roza Muqanova.

Bıylǵy «Altyn tuǵyr» belgisiniń ıegerine Abaıdyń 175 jyldyǵyna oraı qosymsha aqshalaı syılyq taǵaıyndaldy. Bul syılyqqa «Dramatýrgııa» atalymy boıynsha birinshi oryn ıegeri Tóken Áljantegi qol jetkizdi.

Atalymnyń ekinshi orny - Álibek Baıbolovqa, úshinshi oryn - Ádilhan Asanovqa buıyrdy.

«Dramatýrgııa» atalymy boıynsha da arnaıy júldeler taǵaıyndalyp, Baqqoja Muqaı atyndaǵy arnaıy júldemen - Dıdar Amantaı, Qalıhan Ysqaq atyndaǵy arnaıy júldemen - Sovethan Qazıev, Sáken Júnisov atyndaǵy arnaıy júldemen - Óten Ahmet marapattaldy.

Baıqaýǵa usynylǵan shyǵarmalarǵa belgili qoǵam qaıratkerleri, tanymal aqyn-jazýshylar men ádebıettanýshy ǵalymdardan quralǵan qazylar alqasy tórelik etti.