Roza Baǵlanovanyń 100 jyldyǵy: «Astana Opera» mereıtoılyq kontsert beredi
«Asyl arman» mereıtoılyq kontserti 30 naýryzda K.Baıseıitova atyndaǵy Kameralyq zalda bolady. Sondaı-aq eresekter men eń jas tyńdarmandardy «Máńgi óshpes Amadeýs» jańa kontserttik toptamasynyń premerasy men mazmundy Balalarǵa arnalǵan klassıkalyq mýzyka aptalyǵy kútedi.
– Halqynyń erke qyzy Roza Baǵlanova – bul tutas bir dáýirdiń ulttyq nyshany: ol álemdik deńgeıdegi aıtýly oryndaýshylarmen bir sahnada qatar turyp, halyqaralyq memleket jáne qoǵam qaıratkerleriniń birazymen jeke tanys boldy, Qazaqstan kompozıtorlarynyń shyǵarmashylyǵy men qazaq halyq ánderin áıgileý men damytýǵa úlken úles qosty. Roza Baǵlanovanyń maıdan dalasynda mereıin ústem etken kontsertteri onyń ómirbaıanynyń óte eleýli kezeńderi boldy. 1941 jyldyń jazynda ol Máskeý konservatorııasyna joldama alǵan, alaıda soǵys bastalyp, ol maıdanǵa attandy jáne ártister brıgadasynyń quramynda sarbazdardyń aldynda týra aldyńǵy lekte óner kórsetti, Berlınde Jeńis kontsertine qatysty, – dedi «Astana Opera» opera trýppasynyń dırektory Qazaqstannyń eńbek sińirgen qaıratkeri Azamat Jyltyrkózov.
Uly Otan soǵysy kezindegi jankeshtiligi men qaısarlyǵy úshin Roza Baǵlanova «Jaýyngerlik erligi úshin» jáne «Germanııany jeńgeni úshin» medaldarymen marapattalǵan. Soǵystan keıin ol úlken sahnaǵa búkil halyqqa dańqy shyqqan eń ataqty ánshilerdiń biri bolyp oraldy, KSRO-da kópshilikti moıyndatqan tuńǵysh qazaq ártisi boldy. Roza Baǵlanovanyń shyǵarmashylyq joly qazir de «Astana Opera» teatrynyń jas solısteri men qalyptasqan sahna sheberlerine jańa jetistikterge baǵyt berýde.
– Ómiriniń 70 jylyn sahnaǵa arnaǵan Roza Baǵlanova shetelge san márte gastrolmen barǵan, kontserttermen 54 elde bolǵan. Onyń darynynyń jan-jaqtylyǵy erekshe tańdanys týǵyzady: ánshi retindegi belsendi qyzmetinen bólek, Roza Tájibaıqyzy ózin kınoda da synap kórgen, sondaı-aq qazaq tilindegi ómirbaıandyq kitaptyń avtory atandy, – dedi teatrdyń mýzykalyq keńesshisi Qazaqstannyń eńbek sińirgen qaıratkeri pıanıst Raýshan Beskembırova.
Roza Baǵlanovanyń ánshilik daryny týraly barsha qazaqstandyq biledi. Barlyq ýaqytta halyq ony joǵary baǵalady, keńestik zamanda da, egemendik jyldarynda da ol eń joǵary memlekettik marapattarǵa ıe boldy. Bul «Halyq Qaharmany», tórt dúrkin – túrli elderdiń Halyq ártisi, eń joǵary ordender, medaldar men syılyqtar, halyqaralyq baıqaýlar men festıvalderdiń dıplomdary men júldeleri. Uly ánshi jaıly kóptegen kitaptar jazylyp, poetıkalyq shyǵarmalar ómirge keldi, fılmder túsirilip, onyń esimi «Kimniń kim ekeni» aǵylshyn-amerıkalyq entsıklopedııasynyń álem áıelderi jaıly alǵashqy sanyna endi.
– Osynaý erjúrek tulǵanyń barlyq eńbekterin tizip shyǵý qıyn, ol búginde bárimiz – klassıkalyq, sondaı-aq zamanaýı janr ártisteri úshin shabyt kózi men ónege bolyp tabylady. 30 naýryzda kóktemniń keshinde «Astana Opera» teatrynyń solısteri Roza Tájibaıqyzynyń aýqymdy repertýarynan shyǵarmalar oryndap, ulttyq mýzykalyq óner ańyzyna qurmet kórsetedi, – dep pikirimen bólisti Azamat Jyltyrkózov.
Budan bólek, K.Baıseıitova atyndaǵy Kameralyq zaldyń naýryzdaǵy afıshasyna eresekter men balalar aýdıtorııasyna arnalǵan kóptegen jarqyn mýzykalyq keshter endi. Sonymen, 2 naýryzda FORTE-TRIO Qazaqstan Respýblıkasy Memlekettik trıosynyń mýzykanttary áıgili pıanıst Qazaqstannyń eńbek sińirgen qaıratkeri Tımýr Ýrmancheevtiń jetekshiligimen «Siz Bramsty súıesiz be?» kontsertimen sahnaǵa shyǵady. Al 31 naýryzda «Ýaqyt aǵynynda» mýzykalyq keshiniń qyzyqty baǵdarlamasyn basqa tanymal qazaqstandyq ujym – Ǵ.Jubanova atyndaǵy memlekettik ishekti aspaptar kvarteti tyńdarmanǵa usynady, kórkemdik jetekshi – Qazaqstannyń eńbek sińirgen qaıratkeri Ernar Myńtaev (vıolonchel).
Ataqty klassık V.A.Motsarttyń mýzykasy 9, 10 jáne 11 naýryzda «Máńgi óshpes Amadeýs» kontsertteriniń jańa toptamasy aıasynda shyrqalady. «Motsart Forever» kontserti aıasynda alǵashqy keshte Rýslan Baımýrzınnyń jetekshiligimen teatrdyń Kameralyq orkestri men solıster – skrıpkashy Ánel Shákirova men altshy Ahmet Sultanov – elorda turǵyndary men qonaqtaryna avstrııalyq uly sazgerdiń Orkestr jáne skrıpka men altqa arnalǵan kontserttik sımfonııany usynady. Ekinshi keshte úrlemeli mýzykany unatatyn jandardy jarqyn premera kútedi: tuńǵysh ret Qazaqstanda úrlemeli aspaptar men kontrabasqa arnalǵan sı-bemol major Gran Partita (KV361) №10 serenadasy shyrqalady. Toptamany «Astana Opera» Sımfonııalyq orkestriniń birinshi skrıpkasy Qazaqstannyń eńbek sińirgen qaıratkeri Baǵdat Ábilhanov pen pıanıst Saltanat Ábilhanovanyń oryndaýynda «Shamshyraq jaryǵynda oryndalǵan mýzyka» skrıpkalyq sonata keshteri aıaqtaıdy.
Bolashaǵynan úlken úmit kúttiretin jas ártister – Astana Opera Halyqaralyq opera akademııasynyń shákirtteri 4-5 naýryzda «Operaǵa qushtarlyq» jáne «Shuǵylaly Belkanto» qyzyqty kontserttik baǵdarlamalarynda óz daryndaryn elordalyq kórermenge tanystyrady. 15 naýryzda tańdamaly eýropalyq mýzykany unatatyndardy «Frantsýz mánerinde» keshine shaqyrady. Tabıǵattyń kóktemgi jańarýy, molshylyq pen dostyq merekesine 21-22 naýryzda «Qosh keldiń, Naýryz» kontsertteri arnalady.
«PICCOLO» teatry tanymal jobasy aıasynda 19 naýryzda «Astana Operanyń» Kameralyq orkestri men opera solısteri Alla Sımonıshvılıdiń qoıylymynda G.Donıtsettıdiń «Don Paskýale» qyzyqty komedııalyq operasyn usynady. Oryndaýshylardyń keremet akterlik oıyny men sheber vokaldarymen qatar, teatr sýretshisi Manana Gýnıanyń jarqyn dekoratsııalary men kostıýmderi kórermenge jaqsy áser syılaıdy.
Naýryzdyń 23-inen 28-ine deıin eń jas teatrsúıer qaýymdy mazmundy Balalarǵa arnalǵan klassıkalyq mýzyka aptalyǵy kútedi. Joba aıasynda Kameralyq zalda qazaq jáne orys tilderinde qyzyqty kontsertter men spektaklder ótedi: «Mýzyka álemi», S.Prokofevtiń «Petıa men Qasqyr» sımfonııalyq ertegisi, K.Sen-Sanstyń «Janýarlar karnavaly» zoologııalyq fantazııasy, «Sıqyrly ysqy» (Barokko zalynda), T.Beısembektiń «Samuryq kelgen tań» mýzykalyq ertegisi.