«Rosatom» Qazaqstannyń ýran kenishindegi óz úlesiniń bóligin satty

<p>ASTANA. KAZINFORM - &laquo;Qazatomónerkásip&raquo; ulttyq atom kompanııasy&raquo; AQ reseılik seriktestiń keıbir birlesken kásiporyndardan shyqqany týraly habarlady.</p>

«Rosatom» memlekettik korporatsııasynyń kompanııalar tobyna kiretin «Ýranıým Ýan Grýp» AQ túpki benefıtsıary State nuclear Uranium Resources Development Co., Ltd (QHR) kompanııasy bolyp tabylatyn SNURDC Astana Mining Company Limited kompanııasynyń paıdasyna «Zarechnoe» BK» AQ-nyń aktsııalarynyń ózine tıesili 49,979%-yn satty.

Bul rette osy birlesken kásiporyndaǵy Qazatomónerkásiptiń qatysý úlesi ózgergen joq jáne ol 49,979%-dy quraıdy.

«Zarechnoe» BK» AQ 1977 jyly ashylǵan Túrkistan oblysyndaǵy Zarechnoe ken ornynda ýran óndirýdi júzege asyrady. Ken ornyndaǵy ýran qory 2024 jyldyń basynda shamamen 3,5 myń tonnany quraǵan. Ken ornyn ıgerýdi aıaqtaý 2028 jylǵa josparlanyp otyr.

«Ýranıým Ýan Grýp» AQ sondaı-aq «Horasan-U» BK» JShS-tiń jarǵylyq kapıtalyna qatysý úlesiniń 30%-yn jáne «Qyzylqum» JShS-tiń jarǵylyq kapıtalyna qatysý úlesiniń 30%-yn mámile taraptary ony jabý rásimderin aıaqtaǵan jaǵdaıda túpki benefıtsıary China General Nuclear Power Corporation (CGN, QHR) bolyp tabylatyn China Uranium Development Company Limited kompanııasynyń paıdasyna satady dep kútilýde. Osy birlesken kásiporyndarda Qazatomónerkásiptiń qatysý úlesi ózgermeıdi, «Horasan-U» BK» JShS-te 50% jáne «Qyzylqum» JShS-te 50% (janama) deńgeıde saqtalady.

«Horasan-U» BK» JShS Qyzylorda oblysynyń Jańaqorǵan aýdanyndaǵy Soltústik Harasan ken ornynyń «Harasan-1» ýchaskesinde ýran óndirýdi júzege asyrady. Ken ornynyń qorlary 2024 jyldyń basyndaǵy jaǵdaı boıynsha paıdalaný merzimi 2038 jylǵa deıingi 33 myń tonnaǵa jýyq ýrandy quraıdy. «Horasan-U» BK» JShS-te óndirilgen búkil ýran tikeleı sol ıgerilip jatqan ýchaskeniń ózinde ornalasqan «Qyzylqum» JShS-tiń óndiristik qýattarynda qaıta óńdeledi. «Qyzylqum» JShS jer qoınaýyn paıdalaný quqyǵyna ıe emes jáne tek ýrandy qaıta óńdeý boıynsha qyzmetterdi júzege asyrady.

Qazatomónerkásip jańa seriktesterin quttyqtap, birlesken jumysta tabys tileıdi. Qazirgi ýaqytta Kompanııanyń strategııalyq basymdyǵy mıneraldy-shıkizat bazasyn tolyqtyrý jáne qorlardyń turaqty ósýin qamtamasyz etý bolyp tabylady.

Kompanııa perspektıvaly aýmaqtardy baǵalaýǵa jáne jańa ken oryndaryn ashýǵa baǵyttalǵan geologııalyq barlaý jumystarynyń aýqymdy baǵdarlamasyn iske qosty. Bul baǵdarlama atom holdınginiń uzaq merzimdi pozıtsııasyn nyǵaıta otyryp, oń nátıje beredi. Bir ǵana bıyldyń ózinde Qazatomónerkásip perspektıvaly ýchaskelerde ýrandy barlaýǵa tórt jańa lıtsenzııa aldy, olardy kompanııa tek óz kúshterimen oryndaýdy josparlap otyr. Aldyn ala baǵalaýlar boıynsha, osy perspektıvaly ýchaskelerdegi jalpy boljamdy resýrstar 180 myń tonnadan asady.

Osyǵan deıin Qazaqstannyń 2050 jylǵa qaraı atom energetıkasyn úsh ese ulǵaıtý týraly deklaratsııaǵa qosylǵany týraly jazdyq.