Ronaldınonyń rekordyn jańartqan Meırambek «Ordabasydan» shaqyrtý aldy

<p>ASTANA. KAZINFORM &ndash; Dopty áýede 7 994 ret teýip, kópshilikti tańǵaldyrǵan Qazyǵurt aýdanyndaǵy Syntas eldimekeniniń 8 synyp oqýshysy Meırambek Sileýsinov otandyq fýtbol klýb basshylyǵynyń nazaryna ilikken.&nbsp;</p>

Teńbil dopty urshyqsha ıiretin Meırambekti jerlesteri «Qazyǵurttyq Kımmıh» dep atap ketken. Sebebi onyń oıynyn nemis fýtbolshysy Iozýa Kımmıhke uqsatqan. Sondaı-aq onyń «rekordsmen» degen de aty bar. Bul esimdi áýelete dop tebýden aldyna jan salmaǵany úshin ıelengen. 

Búginde Meırambek Sileýsinovtyń aýada dopty túsirmeı teýip júrgen vıdeosy áleýmettik jelide keńinen tarap ketti. Onda oıyndy uıymdastyrýshylardyń «4 000 boldy», «6 000 ret dop tepti», «7 994» degen sózderi anyq estiledi. 

— Jarysqa bir aptadaı daıyndaldym. Mektepke baryp kelgen soń birden jattyǵýǵa kirisemin. Úıde 4 000-5 000 ret dop teýip júrdim. Týrnırde jeńis tuǵyryna kóterilemin dep aldyma maqsat qoıdym, - deıdi jasóspirim.

Talantty jasóspirim dopty áýeletip tebý jarysyna osymen ekinshi ret qatysyp otyr. Alǵashqy ótken jarysta joly bolmaı, dopty 450 ret tepken ol jarys jolynan shyǵyp qalǵan. Al, ekinshi ret uıymdastyrylǵan básekede baǵy jandy. Aýada teńbil snarıadty 2 saǵatqa jýyq túsirmeı tepken (7 994 ret) Meırambek bas júldeni jeńip aldy. 

— Biz birden ınternetti ashyp qaradyq. Brazılııalyq áıgili fýtbolshy Ronaldınonyń ózi aýada dopty 7 432 ret tepken eken. Meırambek bul kórsetkishti jańartty, - deıdi jarysty uıymdastyrýshy, «Rysbek» Fýtbol klýbynyń jattyqtyrýshysy Baqdaýlet Rysbekov. 

Foto: Meırambek Sileýsinovtiń jeke muraǵatynan

Áńgime arasynda Meırambek Gınness rekordtar kitabyna ený úshin rekordttyq kórsetkishin qaıtalaýǵa daıyn ekenin aıtty. 

— Shymkentte ótken jarysqa 400-ge jýyq bala qatysty. Sodan 7 994 ret áýelete dop teýip, rekordty jańarttym. Biraq bul qujat júzinde tirkelmedi. Degenmen 2 saǵat boıy dopty jerge túsirmeı tepken vıdeom bar. Eger Gınness rekordtar kitabyna ený úshin qaıta dop tebý kerek bolsa, oǵan da daıynmyn, - dedi ol.

Úıde Meırambekke aǵasy Bekarys jetekshilik etedi. Kóptegen jarysqa qatysýyna da tikeleı qoldaý bildirip otyrady. Baǵyt-baǵdar berip, keńesin aıtady. 

— Meırambek taıaýda «Ordabasy» fýtbol klýbynan shaqyrtý aldy. Qazir sonyń jumystarymen júrmin. Jalpy baýyrym jastaıynan fýtbolǵa qumar bolyp ósti. Kóptegen jetistikke jetti, aýdanaralyq, oblystyq jarystarda top jaryp, júldeli oryndardy ıelendi. Aýylymyzdyń, aýdanymyzdyń atyn shyǵaryp júr. Bolashaqta baýyrym tanymal sportshy bolatynyna senimim mol, - deıdi aǵasy Bekarys.