Roman Starchenko «Baryspen» kelisimshart merzimin uzartty

<p>ASTANA. KAZINFORM — Shaıbaly hokkeıden Qazaqstan quramasynyń birqatar oıynshylary elordalyq «Barys» komandasymen kelisimshart merzimin uzartty.</p>

Qazaqstan quramasynyń kapıtany Roman Starchenko aldaǵy jyly da «Barys» sapynda oıyn kórsetedi. Hokkeıshi elordalyq klýbpen jańa kelisimshartqa qol qoıdy.

Ekijaqty kelisim bir jylǵa eseptelgen. Forvard ótken maýsymda bir komanda quramyndaǵy oıyn sany (483 kezdesý) jóninen QHL rekordyn ornatty.

2024 jylǵy álem chempıonatynda Roman Starchenko 7 kezdesýde 5 (3+2) ball jınap, quramanyń úzdik bombardıri atandy.

Elordalyq klýb Qazaqstan quramasynyń shabýylshysy Álıhan Ásetovpen de kelisimshart merzimin uzartty. Ekijaqty kelisim bir maýsymǵa eseptelgen.

Ol bıyl álem chempıonatyna ulttyq qurama sapynda altynshy márte qatysty. Dúbirli dodada 7 matchtyń barlyǵynda oınady. Nátıjesinde gol salyp, nátıjeli pas berdi.

Al Arkadıı Shestakov Reseıdiń «Admıral» (Vladıvostok) komandasyna aýysty.

Ortalyq shabýylshy bıyl QHL-dyń turaqty chempıonatynyń 68 matchynda 25 upaı jınap, óz mansap jolyndaǵy úzdik maýsymyn ótkizdi.

2024 jylǵy álem chempıonatynda ol 5 match ótkizip, nátıjeli pas berdi.

Sondaı-aq «Barys» basshylyǵy tarapynan Samat Danııar, Dinmuhamed Qaıyrjan, Kırıll Nıkıtın, Álıhan Ómirbekov, Ańsar Shaıhmeddenov, Andreı Shýtov, Maksım Mýsorovqa usynys jasalǵan. 

Eske salsaq, Qazaqstan quramasy elıtalyq dıvızıondaǵy ornyn tórtinshi jyl qatarynan saqtap qaldy.