Roman Sklıar: Shamalǵandaǵy ótkelge kópir salý úshin 70 jer úıdi súrý kerek

NUR-SULTAN. QazAqparat – Almaty oblysynda poıyz ben avtobýs soqtyǵysqan ótkelge kópir salý úshin 70 jer úıdi súrý kerek. Bul týraly Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«Atalmysh temirjol ótkelimen bir táýlikte – ıaǵnı, kún saıyn 65 poıyz ótedi. Al avtokólik qozǵalysynyń qarqyny – 10 myń avtokólik. Sózsiz, atalyp otyrǵan ótkelge kópir, ótpejol salý kerek. Áıtse de, dál sol aýmaqta ótpejol salý úshin sol jerdegi 70-ke tarta jeke úıdi, 2 janar-jaǵarmaı beketin súrý kerek. Bul álbette, úlken bıýdjettik shyǵyndy talap etedi. Sol sebepti, atalǵan ótkel qosymsha kúzet sıgnalızatsııasymen ǵana emes, avtokóliktiń ótip ketpeýin qamtamasyz etetin kedergilik quraldarymen jabdyqtalǵan bolatyn», - dedi Roman Sklıar OKQ-da ótken baspasóz máslıhatynda.

Mınıstrdiń aıtýynsha, avtokólik joldaryn qaıta jóndeý kezinde mindetti túrde tıisti kópirdiń salynýy qarastyrylady.

«Temir jol jáne avtokólik magıstraldary – avtokólik joldary birinshi, ekinshi jáne úshinshi sanatta bolsa ǵana túıisedi. Shamalǵandaǵy jaǵdaıda avtokólik joly – tehnıkalyq sıpatta ekinshi sanattaǵy jol. Biz ótkelde kópir salýdy kelesi jylǵa josparlap otyrmyz. Biraq, kópir dál osy ótkelde emes, jer úıler azyraq súriletin aýmaqta salynady», - dedi Roman Sklıar.