Roman Sklıar QTJ-ny transformatsııalaý protsesi týraly aıtty

ASTANA. QazAqparat – «Qazaqstan temir joly» kompanııasyn transformatsııalaý eldiń múddesin eskere otyryp júzege asyrylady. Bul jaıynda Májilis depýtattarynyń saýalyna QR Premer-Mınıstriniń birinshi orynbasary Roman Sklıardiń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta «Qazaqstan temir jolyn» ulttyq kólik-logıstıkalyq kompanııaǵa aınaldyrý boıynsha aldyn ala usynystar daıyndaldy. Bul rette, atalǵan usynystar QR Indýstrııa jáne ınfraqurylymdyq damý mınıstrliginiń alańynda qurylǵan, quramyna memlekettik organdardyń, QTJ, «Atameken» UKP jáne bıznes-qoǵamdastyqtyń ókilderi kiretin jumys toby aıasynda qaralady. «Qazaqstan temir joly» transformatsııasy eldiń jáne qazaqstandyq bıznes-qoǵamdastyqtyń múddelerin eskere otyryp júzege asyrylatyn bolady», - dep atap ótedi Roman Sklıar.

Osy jyldyń 7 shildesinde Aqordada ótken elimizdiń kólik-tranzıt áleýetin damytý jónindegi keńeste Memleket basshysy Qasym-Jomart Toqaev «Qazaqstan temir joly» ulttyq kompanııasyn tolyqtaı jańǵyrtý qajet dep esepteıtinin aıtqan bolatyn.

«Qazaqstan temir jolyn ulttyq kólik-logıstıka kompanııasy retinde transformatsııalaıtyn ýaqyt keldi dep oılaımyn. Bul QTJ-nyń mandaty men mindetterin keńeıtýge, kompanııaǵa elimizdiń kólik-tranzıt áleýetin damytý jumystaryn keshendi túrde júrgizýge múmkindik beredi», – degen edi Prezıdent.