Roman Sklıar bastaǵan qazaqstandyq delegatsııa Berlındegi bıznes-forýmǵa qatysty

BERLIN. QazAqparat – Berlınde ótken Qazaqstan-Germanııa bıznes forýmyna Premer-Mınıstrdiń orynbasary Roman Sklıar bastap barǵan memlekettik organdar men kvazımemlekettik kompanııalardyń ókilderinen quralǵan qazaqstandyq delegatsııa qatysty, dep habarlaıdy QazAqparat.

Rrimeminister saıtyndaǵy aqparatqa sáıkes, forýmǵa eki eldiń iskerlik ortalarynyń 200-den astam ókili qatysty. Іs-shara sheńberinde ınvestıtsııalyq jáne saýda-ekonomıkalyq salalardaǵy perspektıvaly jobalar qaraldy. Sondaı-aq nemis kompanııalarymen jalpy somasy 700 mıllıonǵa jýyq dollardy quraıtyn ınvestıtsııalyq jobalardy iske asyrý týraly ýaǵdalastyqqa qol jetkizildi. Budan ózge, LindeGas, SMS Group, CLAAS Group sııaqty jáne taǵy basqa kompanııalarmen yntymaqtastyq keleshegi talqylandy.

Roman Sklıar bıznes forým saýda-ekonomıkalyq jáne ınvestıtsııalyq yntymaqtastyqty belsendendirý, logıstıka sııaqty ózekti salalarda seriktestiktiń damýyna serpin berý, sondaı-aq ekijaqty ózara is-qımyldyń jańa múmkindikterin ashý úshin jaqsy alań bolǵanyn atap ótti.

QR Úkimeti basshysynyń orynbasary atap ótkendeı, Germanııa uzaq jyldar boıy Qazaqstannyń strategııalyq seriktesi men senimdi dosy bolyp keledi. Dıplomatııalyq qatynastar ornatylǵan 27 jyl ishinde elderimiz arasynda yntymaqtastyqtyń irgesi myqty arhıtektýrasy quryldy.

Budan ózge, kóp jyldar boıy Germanııa Qazaqstannyń jetekshi syrtqy ekonomıkalyq seriktesteriniń biri. Mysalǵa, 2018 jyldyń qorytyndysy boıynsha taýar aınalymy tarıhı maksımým – 5,1 mlrd eýroǵa jetti. Bul Germanııanyń Ortalyq Azııanyń barlyq elderimen syrtqy saýdasynyń shamamen 85% quraıdy. Bul rette, sońǵy 14 jylda nemis kompanııalary Qazaqstanǵa shamamen $5 mlrd ınvestıtsııalady.

Qazaqstan-german qatynastarynyń mańyzdy kezeńderiniń biri – bul Qazaqstan men Germanııanyń saıası, ekonomıkalyq jáne sarapshylyq ortalarynyń ókilderi úshin formaldy emes alań retinde Saýda-ekonomıkalyq yntymaqtastyq jónindegi úkimetaralyq jumys toby (ÚAJT), Strategııalyq yntymaqtastyq jónindegi Qazaqstan-German Іskerlik keńesi, sondaı-aq Berlın Eýrazııalyq klýby sııaqty qurylymdardyń ashylýy men belsendi jumysy.

Budan bólek, Roman Sklıar nemis bıznesi úshin bizdiń el Ortalyq Azııadaǵy senimdi seriktes ekenin atap ótti. Búgin Qazaqstan bıznes júrgizý úshin eń qolaıly sharttar usynady. Sebebi bıznesmenderdiń barlyq bastamalary memleket pen Úkimettiń tarapynan únemi qoldaý tabady.